quinta-feira, 10 de maio de 2018

Keta Mai Husu Ba Estadu Kuandu La Votu

PARTILHAR

DILI, (TATOLI) - Bispu Dioseze Baukau, Don Basílio do Nascimento husu ba povu ou sarani Timor-Leste hotu atu iha loron 12, Maiu, partisipa eleisaun, bainhira la vota, sidadaun refere la kontribui determina nasaun nia vida.

“Votu buat ida obrigatóriu ba sidadaun sira tanba se mak la ba vota, keta mai husu ba Estadu konaba nia direitu tanba nia hanesan sidadaun la ezerse nia responsabilidade no la kontribui ba nasaun nia vida. Ne’e duni bainhira governu forma ona mós hirak ne’ebé la vota labele mangame dehan Estadu tenke hare ami, tanba sira la kumpre sira nia obrigasaun,” Don Basílio informa ba Jornalista sira iha Palásiu Governu, ohin.

Lori Uma Kreda nia naran, Bispu husu povu sira tenke hola konxiénsia katak durante tinan lima ukun na’in sira manda povu, maibé durante loron Eleisaun Antesipada, povu mak manda ukun na’in sira.

“Iha loron ne’e povu nia surat oan ne’e importante. Iha loron votasaun sidadaun hotu iha obrigasaun atu hala’o hahalok ne’ebé kumpre ba estabilidade nasaun nian.”

Jornalista: Julia Chatarina | Editór: Manuel Pinto

Imajens: 1 - Bispo Diocese Baucau, Dom Basílio do Nascimento no Primeiru-Ministru, Mari Alkatiri iha Konselhu Ministru. Imajen GPM/Samuel; 2 - Bispu Dioseze Baucau, Don Basílio do Nascimento, bainhira dadalia ho jornalista sira iha Palásiu Prezidente Nicolau Lobato, ohin dadér. Imajen Ajénsia Tatoli/Xisto Freitas.
PARTILHAR

Author: verified_user

Publicação luso-timorense sem fins lucrativos

0 comentários: