DILI, (TATOLI) – Parlamentu
Nasionál (PN) liuhosi sesaun plenária estraordinária, aprova ona reapresiasaun
proposta lei Orsamentu Jerál Estadu (OJE) 2019 iha finál globál ho votu a favor
40, kontra 25 no abstensaun 0.
Ho nune’e proposta lei OJE ho
montante billiaun $2,132, redús milliaun $650, saldo totál billiaun $1,482.
Liuhosi debate ne’e, deputadu
sira husi bankada governu (CNRT, PLP, KHUNTO, UDT/FRENTE MUDANSA), inklui
bankada opozisaun Partidu Demokrátiku (PD) aprezenta proposta redusaun
orsamentu atu sosa asaun ho montante milliaun $650 no halo ajustamentu ba
proposta lei ne’e rasik.
Deputadu proponente husi proposta
ne’e mak Duarte Nunes, Maria Fernanda Lay, Francisco Vasconcelhos, António
Nobre Tilman, António da Conceição no Gilman dos Santos.
Proposta tolu ne’ebé passa ho
votu maioria ne’e iha relasaun ba malu ho objetivu halo armonizasaun.
Proposta númeru hanesan proposta
alterasaun finansiamentu despeza husi reseita noun petrolífera inklui reseita
própria husi fundu autónoma milliaun $198,6, tranferénsia husi fundu
petrolíferu milliaun $1,196.4, empréstimu milliaun $86, utilizasaun saldo konta
tezouru 0, no totál despeza milliaun $1,452.
Iha justifikasaun sumária ba
proposta númeru 1 ne’e, proposta lei OJE 2019 Governu tau milliaun $350 hodi
atu sosa asaun ConocoPhillips nian durante debate iha planária bazea ba veta
dekretu Parlamentu Nasionál númeru 3/v katak atu sosa asaun di’ak liu tau iha
OJE, tanba ne’e PN konsidera hodi adia tan montante ne’e ba orsamentu hodi sosa
asaun ConocoPhillips no Shell.
Nune’e mós liuhosi konfirmasaun
votu dekretu númeru 3/v alterasaun lei Atividade Petrolíferu (LAP) Prezidente
Repúblika (PR) promulga ona alterasaun, tanba ne’e deputadu proponente sira
sente desnesesáriu tau nafatin montante milliaun $650 iha OJE 2019 tamba tanba
sosa ona asaun liuhosi lei númeru 1/2019, alterasaun dahuluk LAP.
Proposta númeru 2 hanesan
proposta alterasaun husi orgaun Ministériu Petróliu no Minerál, Diresaun Jerál
Administrasaun no Finansa, kategoria despeza transferénsia públika, ne’ebé
dotasaun inisiál milliaun $678,747, alterasaun no redusaun milliaun $650, ho
dotasaun finál milliaun $28,747.
Ikus liu proposta númeru 3
proposta alterasaun ba artigu 5, ne’ebé limite autorizadu ba finansiamentu
orsamentu estadu.
Hafoin aprovasaun, proposta Lei
OJE 2019 baixa ba komisaun C ne’ebé trata finansa públika para bele halo
redasaun finál no manda ba Xefe Estadu.
Jornalista: Julia Chatarina | Editora:
Rita Almeida
Imajen: Primeiru-Ministru Taur
Matan Ruak, ho membru governu sira, ohin partisipa debate reapresiasaun OJE
2019 iha uma fukun. Imajen Antonio Goncalves.
Sem comentários:
Enviar um comentário