Pagamentu 60% ba traballadór sei finaliza iha 15 agostu

DILI, 07 agostu 2020 (TATOLI) -- Prezidente Konsellu Administrasaun Seguransa Sosiál (INSS), Longuinhos Armando Leite, hatete bazea ba infromasaun hosi ekipa tékniku katak pagamentu 60% ba traballadór sira sei finaliza iha 15 agostu tinan ne’e.

“Tuir ita-nia ekipa tékniku katak ita nia prosesu pagamentu 60% ba traballadór sira sei finaliza iha 15 agostu tinan ne’e, tanba ekipa halo pagamentu ba traballdór hamutuk 5000-resin ona,” dehan Prezidente Konsellu Administrasaun Seguransa Sosiál (INSS), Longuinhos Armando Leite ba Agência TATOLI iha nia knaar fatin Caicoli, Dili, kinta ne’e.

Hosi traballadór rihun 35 ne’e, nia hatutan, la’ós husu hotu pagamentu 60% maibé balun husu Governu atu estende de’it tanba nia fiar katak sei finaliza iha fulan ne’e.

Iha biban ne’e, Prezidente INSS hakarak fó obrigadu ba kompañia sira ne’ebé uza rasik nia osan hosi selu no asegura ninia traballadór no la fó todan ba Governu.

“Ha’u hakarak fó obrigadu ba kompañia sira ne’ebé mak ajuda ona Governu tanba sira iha osan ne’ebé mak adekuadu hodi bele selu ninia traballadór, hodi la fó todan ba Governu. Pagamentu 60% ba traballadór sira hahú iha 9 jullu 2020,” dehan Prezidente INSS.

TATOLI | Jornalista: Osória Marques | Editór: Cancio Ximenes

Notísia Relevante: Governu Aloka Osan Miliaun $11 Ba Pagamentu 60% Ba Traballadór