Prezidente Parlamentu Nasional
nian apela ona, iha loron-tersa ne'e, ba deputadu sira hodi promove
konsiliasaun ho diálogu, ho sentidu Estadu nian no "dedikasaun hodi
defende interese nasional nian".
"Parlamentu tenki promove
konsiliasaun, halibur esforsu sira hodi konsolida Estadu ho dezenvolvimentu ho
prosperidade nia di'ak, kumpri nia misaun polítika sira, lejislativa ho
fiskalizadora", afirma hosi Aniceto Guterres Lopes.
Aniceto Guterres Lopes ko'alia
iha sesaun solene hosi abertura ba sesaun lejislativu datoluk hosi lejislatura
dalima Parlamentu Nasional nian, ne'ebé Prezidente Repúblika, Francisco
Guterres Lu-Olo, halo mós diskursu.
Hanoin hikas fali dezafiu sira
ne'ebé maka nasaun hasoru dezde 2017, ho krizi polítika ida maka'as, Aniceto
Lopes subliña ona importánsia hodi reforsa medida sira konsolidasaun Estadu
nian no, iha kontestu atual, hodi aselera medida sira rekuperasaun ekonómiku
nian.
"Tenki reforsa polítika sira
ho planu rekuperasaun ekonómiku hodi konsege sustenta moris ekonómiku
Timor-Leste nian hodi evita atu afeta estabilidade ho seguransa nasional",
nia destaka.
Kona-ba impaktu hosi pandemia
COVID-19, ne'ebé aumenta krizi ekonómiku iha nasaun, prezidente Parlamentu nian
hatete ona katak "dezentendimentu ho diverjénsia polítika" kona-ba asuntu
bele aumenta risku ba populasaun.
Lopes konsidera ona importante
"asegura atu lei ho polítika reflete nesesidade sira hosi sidadaun
sira" no defende ona "komunikasaun dinámika ida ho permanente entre
deputadu sira ho eleitor sira, konkretiza direitu ba petisaun ho partisipasaun
ativa hosi sidadaun sira".
Prezidente Parlamentu nian
defende tan servisu hodi komunika ho sidadania, asegura atu sosiedade sivil la
organizadu iha fatin "ba partisipasaun efetivu" ho garanti
kordenasaun iha dezenvolvimentu hosi kuadru lejislativu.
Iha konkretu, no iha referénsia
iad ba lei antikorupsaun ne'ebé foin aprovadu, Aniceto Lopes hatete katak
Parlamentu agora tenki prepara "enkuadramentu legal ne'ebé presiza atu
reforsa movimentu prevensaun ho kombate hasoru korupsaun iha Timor-Leste",
liuliu kona-ba kapasidade téknika sira.
Iha tempu hanesan, responsável
defende ona aumentu fiskalizasaun polítika ida ho ezekusaun nian hosi Orsamentu
Jeral Estadu (OJE), "funsaun importante ida hodi asegura kualidade ho
benefísiu sira hosi dezenvolvimentu ba povu".
Iha sesaun lejislativu foun,
Aniceto Guterres Lopes hakarak tan debate sira ho membru sira Governu nian, iha
plenáriu no iha komisaun espesializadu sira ho aumenta informasaun ba públiku.
Sapo TL | Lusa
Sem comentários:
Enviar um comentário