AHI HAN PERTAMINA, HEIN PROSESU INVESTIGASAUN

Komandante Operasaun Servisu Investigasaun Kriminal (SIK) Inspektor Xefi Mouzinho Tavares Correia hatete, kazu kona ba ahi han Pertamina foin lalais ne’e hein prosesu investigasaun.

Mouzinho dehan, prosesu investigasaun ne’e la’o nafatin, no rejista ona iha Ministeriu Publiku, ne’ebé sei halo aprosimasaun hodi hetan delegasaun husi Ministeriu Publiku atu hala’o prosesu investigasaun, tanba kazu ne’e ho nivel ne’ebe bo’ot entaun sira husi investigasaun nasional mak sei halo investigasaun ba kazu ida ne’e.

Investigasaun iha kazu ida ne’e prinsipalmente SIK sei tenta atu identifika motivo husi kazu ne’e, mesmu iha lokal de krimi hetan evidensia balun ne’ebe to’o ohin seidauk bele halo konkluzaun atu hatene kazu ne’e iha intensaun ruma ka lae? tanba ne’e SIK sei hein delegasaun husi MP atu halo investigasaun profundo.

“Ami sei bolu hotu atu notifika ema sira ne’ebe hatene ou pelo menus iha ne’eba (Pertamina) bainhira asidente ne’e akontese, depois kazu ne’e ami sei halo investigasaun konjuntu entre Polisia Nasional Timor Leste (PNTL) ho Autoridade Nasional Petrolifero (ANP), liu-liu PNTL atu haree asuntu investigasaun Kriminal nian, ANP sira mak sei halo investigasaun ida ne’ebe haree liu ba asuntu administrativu,” dehan Inspektor Xefi Mouzinho Coreia iha Kuartel Jeral PNTL, Kinta (23/07).

Bainhira hatan kona ba kazu ne’e iha intensaun ruma husi ema ruma ne’ebe hakarak hamosu asidente ne’e, Mouzinnho hatete, ne’e seidauk iha konkluzaun kona ba kazu ne’e rasik. Maibe prosesu investigasaun mak bele responde.

Mouzinho Correia mos hatete, iha evidensia balun mak hanesan sira ne’ebé servisu iha ne’eba (pertamina) ho tan evidensia forensik balun ne’ebe bele fo esplikasaun ba kazu ida ne’e. maibe seidauk bele iha konkluzaun klean tanba sei halo analiza ba dadus ne’ebe hetan iha lokal de krime.

“Ha’u espera parte Pertamina bele fo apoia para prosesu investigasaun ne’e bele la’o diak, porque ida ne’e la’os ba interese ema ida rua nian, maibe ida ne’e interese komun,” dehan Mouzinho Correia.

Kazu ahi han Pertamina ne’e, akontese iha Kinta (16/7) kalan, tanba fallansu téknika husi tekniku Pertamina ne’e rasik, hodi rezulta nain rua mate no nain ida kanek.nes

Jornal Nacional