Mauk Laiha Direitu Husu Hapara Operasaun

DILI – Operasaun neebe halo hosi Empeniamentu Operasaun Konjunta ba grupu Conselho Revolusionariu Maubere (CRM), neebe mak lidera hosi Mauk Moruk too oras nee sei kontinua lao, maske Mauk Moruk rasik liu hosi nia alin L7 husu atu hapara operasaun nee.

Tuir Eis Vise Primeiru Ministru, Mario Viegas Carascalao, ba STL iha Hotel Timor Kinta (23/07) katak Mauk Moruk laiha direitu atu husu hapara operasaun neebe maka halao hosi F-FDTL nomos PNTL, tanba operasaun nee rasik desijaun estadu no estadu maka iha direitu atu hapara.

Mauk Moruk iha situasaun neebe deit nunka iha poder atu ejiji ba governu hodi hapara operasaun hasoru nia, tanba mandatu nee governu maka hasai tanba governu nee governu responsabel no F-FDTL no PNTL ejekuta sira nia knar nee tuir lei nee duni laiha posibilidade atu hapara operasaun hodi ema nee livre nee tuir hau nia hanoin,” hatete Carascalao.

Nia hatutan se deit maka komete krime atu boot ou kiik heroi ou laos heroi, tenke prosesu tuir lei no wainhira la prosesu tuir lei maka lei mos lakon nia kreabilidade no nasaun nee sai sai buradu, tanba nee hakarak ka lakohi se mak halo krime tenke ba responsabiliade iha Tribunal atu nunee bele rejolve.

Iha fatin ketak tuir Diretor Ezekutivu Asosiasaun HAK, Manuel Monteiro, hatete estadu tenke iha politika ida atu bele hapara lalais problema Mauk Moruk, nunee povu labele kontinua sai vitima. Informasaun kompletu iha STL Jornal no STL Web, edisaun Sesta (24/7/2015). Thomas Sanches

Suara Timor Lorosae