Eis Refujiadu TL Infrenta Deskriminasaun Relijiaun

Eis refujiadu sira ne’ebé oras ne’e moris iha Atambua no Kupang hasoru problema oi-oin. Sira laiha hela fatin no toos hodi hatutan sira nia moris. Problema hirak ne’e akontese tanba iha deskriminasaun ne’ebé halai liu-ba iha relijiaun.

Atu hatene kle’an problema ne’e, Jornál Semanál Matadalan (MTD) halo entrevista eskluzivu via email ho Eis Líder Pro Autonomia, Dr. Basílio Diaz Araújo (BDA) iha foin lalais ne’e.

MTD:Tuir informasaun ne’ebé ami hetan hosi mídia online Kompas katak eis refujiadu sira nia moris iha NTT (liu-liu Atambua no Kupang) át liu. Sira laiha hela fatin no toos hodi aguenta sira nia moris. Karik info ida ne’e loos?

BDA: Informasaun ne’e loos tanba governu sentrál fó ajuda barak maibé ajuda barak maka la tuir saida maka refujiadu sira presiza. Eis refujiadu sira presiza rai maibé governu fó de’it uma. Refujiadu presiza toos maibé governu fó de’it kalen para halo uma.

MTD: Sé hanesan ne’e, tuir ita boot nia hanoin, solusaun di’ak liu atu rezolve problema ne’e maka oinsá?

BDA: Ha’u hanoin agora refujiadu sira komesa moris mesak ona. Barak maka komesa halo toos iha ema rai no to’os, depois sira fahe rezultadu ba rua. Liu hosi meiu ida ne’e refujiadu komesa moris mesak ona.

MTD: Hanesan timoroan no eis líder refujiadus, ita boot sira halo esforsu ruma atu rezolve problema ida ne’e?

BDA: Esforsu iha liu-hosi organizasaum ida naran Komite Nasional Korban Politik Timor-Timur (KOKPIT) ho abreviasaun KOKPIT. Organizasaun ne’e konsege ona ajuda barak ba refujiadu sira ne’ebé hela iha rejiaun Java, Sulawesi, ho áreas liur hosi Kupang.

MTD: KOKPIT ne’e iha governu nia okos ka oinsá?

BDA: KOKPIT ne’e ONG. Nia prezidende naran Batista Suka Kefi, Oe-Cusse oan ida. Iha tinan 10 liu-ba sira konsege hetan anjuda 3,5 jutas ba família ida. Iha tinan 5 liu-ba ne’e sira konsege 5 jutas rupiah. Agora daudaun governu atu fó tan 10 jutas ba família ida-idak.

MTD: Tanbasá maka eis refujiadu sira ne’e labele iha direitu hetan rai iha ne’ebá?

BDA: La’os laiha direitu direitu maibé governu maka la fó ajuda. Sé sira iha osan, sira iha direitu hanesan ema Indonéziu seluk.

MTD: Razaun governu la fó ajuda ne’e saida?

BDA: Governu lokál iha Kupang maka lakohi tanba sira kakohi refujiadu Timor sira moris iha Kupang.

MTD: Tuir ita boot nia haree, ne’e deskiriminasaun ka lae?

BDA: Iha problema oituan ho relasaun entre polítika lokál ho problema relijiaun protestante tanba maoria relijiaun refujiadu sira katóliku no maioria rai na’in ne’e protestante. Refujiadus nia prezensa polítika bele muda mapa polítika ba governasaun katólika iha governu Kupang nian.

Deskriminasaun haree liu-hosi termu polítika nian tanba ema katóliku sira iha Flores ho Atambua bele halakon ema protestante sira iha área kupang ho Soe.

MTD: To’o ne’ebé ona vontade hosi parte governu lokál no igreja parte rua (protestante no katólika) rezolve problema ida ne’e?

BDA: Ha’u la haree sira nia vontade. Igreja rua hanesan de’it. Igreja katólika hakarak refujiadus sira tenki fila hotu ba sira nia moris fatin.

MTD: Tuir ita boot nia hanoin, solusaun ba problema ne’e maka saida?

BDA: Laiha solusaun. Husik ba povu sira deside sira nia án rasik.

MTD: Karik maka sira deside hakarak fila hikas ba Timor, ne’e solusaun di’ak ida ka lae?

BDA: Ha’u hanoin barak maka lakohi fila tanba sira nia rai ho uma fatin mós ema seluk okupa ona no ne’e sira kria problemas foun ne’ebé iha mós implikasaun ba sira nia vida. (*)

Matadalan