terça-feira, 1 de dezembro de 2015

Fretilin maka evita funu sivil iha 2006 - Lu-Olo


Bele mosu funu sivil iha Timor-Leste, karik iha 2006 Fretilin “halo reasaun hasoru” situasaun ne’ebé hatuun Mari Alkatiri hanesan primeiru ministru, dehan prezidente partidu, Lu-Olo ba Lusa. 

“Ami bele halo ida ne’e. Maibé Fretilin lakohi”, dehan Lu-Olo ba Lusa durante entrevista, hodi esplika liu tan katak nia rasik hamutuk ho Mari Alkatiri (sekretáriu jerál hosi Frente revolucionária do Timor-Leste Independente [Fretilin] no iha tempu ne’ebá hanesan xefe Governu) maka trava ka hapara atu militante rihun 30 tama iha Dili, hodi konsentra hamutuk.

“Ami halo parte iha sorumutu ne’ebé ami-ninia militante sira halo, hakalma uitoan sira relasiona ho situasaun ne’ebé ladun di’ak ne’e, nomós ko’alia hamutuk ho sira to’o madrugada, hodi iha falo loron tuir mai, sira tama ba Dili. Maibé bainhira sira tama, lakria konfuzaun ka tama ho didi’ak no laestraga ema ida”, hatutan tan Lu-Olo.

Tuir líder Fretilin, eis-prezidente hosi Parlamentu Nasionál, situasaun ne’e hatudu “saida maka militante Fretilin sira sente ba Estadu ne’e nomós ba sira-ninia lideransa”, nune;e mos hanesan rekoñesimentu “ida ne’ebé importante atu garante dame no estabilidade iha ita-rain”. 
Kontornu ezatu hosi saida maka akontese iha 2006 kontinua detalla, liu hosi interveniente hirak ne’ebé nonok hodi ladehan sai kona-ba saida maka akontese ka depois maka foin hato’o sira-ninia deklarasaun.

Komplesidade ida ne’ebé envolve manifestasaun lidera hosi bispu Dili kontra Governu ninia intensaun atu labele hanorin disiplina kona-ba relijiaun no morál obrigatoriamente iha eskola, hanesan movimentu polítika ida ne’ebé forte kontra Governu hosi Mari Alkatiri nian, inklui konflitu nomós problema ne’ebé akontese iha forsa defeza (F-FDTL) nomós polísia (PNTL) ninia laran.

Hahalok ne’ebé bele hamosu lalais problema entre ema hirak ne’ebé antigu, entre Prezidente Xanana Gusmão ho Mari Alkatiri, hodi ikus mai komandante Polísia Militár, Alfredo Pires mos sai no halo aprosimasaun ba Gastão Salsinha, eis-tenente F-FDTL nian ne’ebé mos hirus ho ierarkia militár nian.

Balun hateten katak atu hanesan golpe ida hasoru governu, balun dehan katak funu sivil maka sei atu akontese, halo krítika ba papel Austrália nian, ba embaixadór amerikanu iha Dili nomós interveniente polítika nasionál no estrajeiru sira seluk.

Lu-Olo insisti katak iha tempu ne’ebá mosu "presaun barak" hosi interna no esterna kona-ba Xanana Gusmão, tanba ema barak maka ladun gosta, tanba ne’e maka desde ukun, sira hakarak hatuun tiha Governu Fretilin nian.

“Bainhira Fretilin hahú ukun nasaun ne’e, lorloron sempre iha manifestasaun iha palásiu ninia oin. Ida ne’e lalos, tanba sira lakonsege hatuu primeiru ministru poltikamente, maka sira tenke halo hanesan ne’e”, dehan. 

“Sira tenke hili dalan refere hodi hamonu governu Fretilin nian, nomós hatuun Mari Alkatiri hosi kargu nu’udar primeiru ministru”, tenik. Husu kona-ba Xanana Gusmão ninia papel iha tempu ne’ebá, Lu-Olo konsidera hanesan “desizaun ne’ebé foti lalos”, tanba fó fali “garantia” katak Alkatiri sei tuun, no ida ne’e nu’uadr “erru ne’ebé Xanana Gusmão fó sai ba publiku”.

Kona-ba ninia relasaun ho Xanana Gusmão, Lu-Olo esplika katak “iha bikan rua”, ida durante períudu rezisténsia ne’ebé “respeita malu” no ida hafoin ukun-aan maka, tuir Lu-Olo mosu “diferensa balun, ne’ebé dalabarak hala’i liu” ba iha tema governasaun nian.

No lakohi fó komentáriu kona-ba ema hirak ne’ebé hanoin katak Xanana Gusmão “sosa ona” dame ho Mari Alkatiri liu hosi projetu Rejiaun Administrativa Espesiál Oekussi, ne’ebé kria bainhira ida dahuluk uluk sei hanesan xefe Governu no oras ne’e daudaun hanesan ema daruak.

Nia konsidera katak imajen Xanana Gusmão nian, prejudika “tanba ema hirak ne’ebé besik nia” no entrega Oekussi ba Mari Alkatiri tanba hakarak kria “pontu referensia ida ba dezenvolvimentu rai ne’e nian”.

Kona-ba futuru, karik Fretilin kontinua serbisu ka la’e hamutuk ho Congresso Nacional da Reconstrução Timorense (CNRT), partidu ne’ebé lidera hosi Xanana Gusmão no oras ne’e hetan votu barak liu, Lu-Olo esklui ipóteze ruma.

Maibé konsidera katak “iha Governu ka iha opozisaun Fretilin nian, hatudu ona prova katak tenke fó duni kontribuisaun ne’ebé presija hodi kria estabilidade no dezenvolve nasaun ne’e” no importante maka tenke serbisu hamutuk.

“Ita tenke maximiza rekursu hirak ne’ebé Timor-Leste iha. Ha’u la’os ko’alia de’it kona-ba rekursu minarai. Maibé fila hikas ba ita-ninia sosiedade. Ita tenke maximiza ida ne’e, tanba importante liu maka hatene tau ema hirak ne’e atu halo buat ida ne’ebé di’ak ba ita-ninia nasaun”, tenik. 

Eleisaun hanesan oportunidade di’ak ba populasaun sira hodi hili, maibé governasaun nasaun nian, maka tenke buka halibur talentu, no “tenke inklui mos ema sira ne’ebé iha kbi’it atu ukun”.

Lu-Olo rejeita mos kona-ba ema hirak ne’ebé kritika koperasaun entre Fretilin ho Governu nomós sira ne’ebé ezizi liu tan opozisaun, hodi insisti katak ninia partidu hakarak kolabora hodi ajuda hadia governasaun.

"Koperasaun ne’ebé ami halo hamutuk ho Governu, lasiknifika katak Fretilin laiha kapasidade atu halo krítika kontra Governu ne’e rasik. Ida ne’e maka ema seluk lakomprende. Sira dehan katak ami hamutuk ho Governu, no ida de’it. Ami la’os ida de’it, maibé ami buka solusaun hamutuk, no ami hateten katak atu sira tenke ukun ho di’ak ", esplika.

SAPO TL ho Lusa 

Sem comentários: