Hadi’a Drainajen iha Díli, Governu Impresta Milaun 50 Hosi Xina

Governu Timor-Leste (TL) asina akordu impréstimu ho Banku Exim Xina hodi hetan asesu impréstimu konsensionál ho valór milaun 50  dolares, hodi harii no hadi’a sistema drainajen iha Sidade Díli.

Relasiona ho impréstimu ne’e hamosu lamentasaun hosi sosiedade sivíl sira katak Timor-Leste la merese atu impesta, tanba liu-hosi impréstimu ne’e bele fó hela todan ida ba povu TL iha futuru bainhira ita labele selu hikas.

“Impréstimu ne’e la’os prinsipiu di’ak ba Timor-Leste atu halo. Timor tenke apriende hosi nasaun seluk iha mundu tomak, ikus mai falla besik atu monu (bangkrut) tanba nia kapasidade atu selu fali tusan labele,” Peskizadór Ekonómiku ONG Lao hamutuk, Juvenal Dias hato’o kestaun ne’e iha MNEK, Segunda (15/02/2016).

Ativista ne’e dehan uluk kedas Lao Hamutuk la konkorda Impréstimu Milaun 50 hosi Banku Exim Xina ne’e sei ki’ik liu kompara ho planu Governu nian atu foti liu-hosi Biliaun ida  (1) iha tinan lima (5) oin mai.Signifika katak estadu ida ne’e fó todan boot ba povu Timor-Leste.

Juvenal dehan reseitas minarai agora tún, poténsia fundu petrolíferu mós bele hotu iha futuru maka Timor sei laiha osan, entaun sé maka atu selu tusan ida ne’e.

Estadu ida ne’e tenke hanoin mós futuru povu Timor nia moris, labele hanoin sira nia-án de’it. Sé estadu kontinua halo impréstimu agora maka futuru jerasaun sira sei hasoru problema boot iha nasaun ne’e.

“Tanbasá ita labele uza osan rasik? Imprésta milaun 50 ohin loron, selu fali ho funan iha futuru. Entaun, tinan-tinan fundu petrolíferu ne’e nia funan ita tenke haruka ba Xina, Manila, Tokyo,” Juvenal esplika.

Nia hatutan governu tenke haree ona polítika ida di’ak ba futuru, labele ita hanoin katak ita riku oan entaun hakarak impresta tún sa’e no ita ba halo asaun kariedade tún sa’e iha rai seluk no husik povu moris terus nafatin.

Iha parte seluk, Diretór Ezekutivu ONG Luta Hamutuk, Mericio Akara hateten impréstimu ne’e desizaun governu ne’ebé deside ona no ita labele hapara. Importante maka ita tenke implementa ho didi’ak duni para bele fó benefísiu ba povu ida ne’e.

“Bainhira implementa ne’e ho kualidade di’ak duni, no garantia katak aban bainrua bele selu fali. Tenke fó kampu de traballu ba timoroan, la’os impresta tiha ema seluk maka mai serbisu fali,” Mericio dehan.

Nia hatutan katak impaktu ba futuru maka ita bele selu ga lae. Agora daudaun ita nia fundu minarai mós tún, keta aban bainrua ita labele selu karik, sei fó todan ida ba povu Timor-Leste iha futuru.

Tanbasá ita la’os uza osan rasik no tenke impresta? Akara dehan “ita nia osan mós laiha ona ne’e. Agora ne’e hela 16 billiaun de’it ona, tún ba beibeik la to’o tinan haat (4) osan hotu ona”.

Prioridade duni drainajen sidade Díli to’o ita impresta osan? Nia esplika katak ne’e prioridade duni maibé uluk kedas ema hotu ko’alia maibé la halo to’o ohin loron ne’e maka problema.

Prezidente komisaun E Parlamentu Nasionál ne’ebé trata asuntu infraestrutura, no hosi bankada partidu CNRT, Pedro dos Mártires hateten, kona-ba empréstimu $ millaun 50 ne’e nia lakohi fó komentáriu. Maibé, kona-ba sira nia fiskalizasaun ba rehabilitasaun sistema drainajen iha kapitál Díli ne’e nota katak, kompañia hosi Xineza maka hala’o daudaun, maibé hanesan fazeadu, multi annual. Ne’ebe, halo la dauk kompletu no bainhira udan provoka bee sa’e nafatin.

Ne’eduni, sira ezije atu aselera hodi nune’e kanalizasaun bee ne’e ba to’o tasi atu labele kria bee sa’e durante udan boot iha kapitál Díli. Nia dehan, kona-ba prosesu rehabilitasaun drainajen iha kapitál Díli atinji pursentu 50, maibé sei falta barak. “Kapitál Díli ne’e kuaze atinji 50 itál porsentu ona, maibé sei barak,” dehan deputadu ne’e iha Parlamentu Nasionál, Segunda (15/02/2016).

Iha diskursu asina akordu, Ministra Finansas, Santina Cardoso hateten implementasaun projetu ida ne’e sei hasa’e dezenvolvimentu urbana no kualidade moris iha sidade Díli.

“Konstrusaun no melloramentu sistema drainajen iha Dili sei diretamente hadi’a saúde populasaun sira iha Dili, hamenus risku inundasaun no estragus ba uma-kain no negósiu, hasa’e reziliénsia uma-kain sira ki’ak liu, no fasilita dezenvolvimentu ekonómiku” Santina esplika.

Nia salienta katak projetu ida ne’e projetu pro ema-ki’ak ne’ebé sei fó impaktu importante ida ba sidade Díli no sei kontribui ba relasaun di’ak entre Timor-Leste ho Repúblika Popular Xina iha futuru.

Total Impréstimu ne’ebé Timor-Leste sei hetan hamutuk milaun 50 dollar, ho juru % 2 kada tinan ba tinan 20 ho grace period tinan 5 no maturidade tinan 20. Impréstimu ida ne’e konsidera hanesan konsesionál ida Xina ho nia grant element 27.76%, Xina liu valór konsesionalidade 25% ne’ebé determina hosi OECD.

Seremónia asinatura ne’ebé hala’o iha loron 18 Dezembru 2015 iha Ministériu Finansa ne’e partisipa mós hosi Ministru Planeiamentu no Investimentu Estratéjiku, Xanana Gusmão, Ministru Obras Públikas, Gasão de Sousa, Ministru Petróleu no Rekursu Minerál, Alfredo Pires, Vise Ministru Finansa, Helder Lopes no reprezentante sira hosi kompañia Xina balun hosi Xina. (Efrem)

Matadalan