Taur Kestiona Família Xanana-Alkatiri Hetan Previleiju Barak iha Kontratu Estadu

Prezidente Repúblika, Taur Matan Ruak (TMR) liu-hosi mensajen estadu iha Parlamentu Nasionál, Kinta (25/02/2016), hateten famílias Eis Líder Rezisténsia Xanana Gusmão no Dr. Marí Alkatiri hetan previleiju boot iha kontratu estadu nian.

“Ema mai ko’alia ho Prezidente lamenta katak familiares maun Xanana, maun Marí ho nia amigu sira hetan previleiju barak iha kontratu estadu nian,” Taur esklarese asuntu ne’e relasiona ho kazu ezonerasaun (hapara) Xefi Estadu Maior Lere Anan Timor hosi nia kargu hanesan Maijór Jenerál.

TMR haktuir uluk iha Soeharto nia tempu, nia família rasik maka hatun nia tanba previleiju demaziadu. Taur aumenta katak atan foun agora maka sira ne’ebé tauk sai hosi serbisu no lakon para hateten de’it “Ya Pak”.

Prezidente haruka karta ida ba governu hodi husu, tanbasá maka TL altera nia pozisaun kona-ba tratadu tasi Timor (Fronteira Marítima), kuandu Xanana ho Marí rasik iha sira nia tempu maka ita asina ba tinan 50.

Molok hakotu mensajen estadu, Taur Matan Ruak husu atu governu ho Parlamentu atu labele haree prezidente hanesan adversáriu maibé hanesan parseiru.

Depois de Taur deklara asuntu ne’e iha uma fukun Parlamentu Nasionál, Deputadus Bankada CNRT no Fretilin nonók lakon hodi lakohi fó komentáriu ba mídia sein iha esplikasaun ida klaru.

Hatán kona-ba kestaun Xanana ho Alkatiri nia família hetan projetu barak iha estadu, Deputadu Bankada PD, Virgílio Hornai informa katak ita komesa harii ona liurai-liurai ki’ik oan iha parte ekonomia família liu-hosi kondisoens estadu nian.

Virgilio dehan partisipasaun ekonómiku ne’e tuir loloos labele akontese tanba kontra lei. Nia esplika ema balun kaer poder barak entaun nia família barak maka hetan projetu oi-oin.

Programa Manajer Asia Justice and Right (AJAR), Inocêncio de Jesus dehan deklarasaun prezidente ne’e la naran mosu. Prezidente iha dadus kompletu kona-ba assuntu ne’e, tanba ne’e maka parte kompetente hanesan Komisaun Antí Korupsaun (KAK), Ministériu Públiku, Polísia Investigasaun Kriminál maka tenke buka tuir kazu ne’e.

“Ami haree katak iha duni prátika sira hanesan ne’e tanba Timor kloot. Projetu Oe-Cusse, Díli laran, projetu boboot sira sé maka kaer. Ita dezafia instituisaun Ministériu Públiku, KAK atu halo investigasaun,” Inocêncio dehan. (Efrem)

Matadalan