PR TAUR: “HA’U HO XANANA MESAK DIFISIL REZOLVE PROBLEMA VETERANUS”

Prezidenti Repúblika (PR) Taur Matan Ruak hateten katak, nia ho eis Primeiru Ministru (PM) Kay Rala Xanana Gusmão mesak, difisil atu rezolve problema veteranus iha Timor laran tomak.

Taur Matan Ruak dehan, problema veteranus nian agora ne’e, tanba hot-hotu hakarak hetan 8 a 14, no hot-hotu hakarak simu osan.

“Problema veteranus ami nain rua maun Xanana mesak labele, imi hotu tenke fó imi nia kontribuisaun, ita labele husik ita nia problema ne’e ba jerasaun foun sira, ita mak tenke rezolve, tanba ita mak koñese malu,” dehan Taur Matan Ruak bainhira dialogu ho komunidade iha Suku Fatubesi, Postu Administrativu Hatolia, Munisípiu Ermera, Kinta (18/02).

Taur Matan Ruak haktuir, foin dada’uk Governu harii estrutura kombatente, maibé nia veta tiha lei ne’e, hodi husu ba Governu atu hamoris fali estrutura antigu.

PR Taur esplika, nia veto estrutura kombatentes ne’ebé Governu haruka ba nia, tanba problema veteranus iha Timor Leste ne’e, agora bo’ot tebes.

Nia hatutan, estadu loke rejistu veteranus dala rua ona, iha 2003 no 2009, maibé hamosu problema barak.

PR Taur Matan Ruak esklarese lia hirak ne’e hodi responde ba preokupasaun komunidade Suku Fatubesi, Abilio Soares Tilman, ne’ebé hatete katak, veteranus sira iha Suku refere to’o agora se terus hela.

“Oinsa mak ho ami veteranus sira ne’ebé mak agora servisu laiha, ami atu sustenta ami nia familia oinsa,” katak nia.

Nia husu Taur Matan Ruak kona-ba oinsa mak atu halo monumentu ida iha Nino Conis Santana nia mate fatin atu valoriza istória.

Nia hatutan, uluk Timor Leste (TL) seida’uk ukun-an, ema barak hateten katak, Fatubesi ne’e ukun rasik-an tiha ona, maibé tanbasa mak veteranus sira iha Fatubesi to’o ohin loron hetan de’it 0 a 3.

“Ami Fatubesi ne’e kala aman sarani laiha iha Komisaun Homenajen (KH), ne’e mak ami hanesan ne’e nafatin, maibé labuat ida, entrega ba Maromak mak hatene,” lamenta Abilio.

Alénde ne’e, veteranu Paulo Gomes dehan, to’o agora veteranu sira iha Suku refere seida’uk hetan konsiderasaun husi Estadu.

“Ami susar tebes, ami halo buat hotu hanesan, halo nusa mak familia balun hetan bo’ot, ami hetan fali ki’ik,” katak nia.cos

Jornal Nacional