Sporting ho Sporting de Braga husu adezaun ba Konfederasaun Emprezariál CPLP

Sporting ho Sporting de Braga husu ona adezaun ba Konfederasaun Emprezariál CPLP, solisitasaun ne'ebé, hanesan ho SL Benfica, sei aprova iha reuniaun ida hosi organizasaun, ne'ebé sei hala'o iha loron-domingu iha Timor-Leste, haktuir hosi fonte ofisiál iha loron-segunda ne'e.

Iha deklarasaun sira ba ajénsia Lusa, José Medina Lobato, sekretáriu-jerál hosi Konfederasaun Emprezariál hosi Komunidade Nasaun sira Lian Portugés nian (CE-CPLP), hatete katak kandidatura tolu - hosi Benfica nian aprezenta tiha ona iha fulan-Janeiru nia rohan - sei aprova iha loron 28 fulan ne'e iha reuniaun hosi diresaun instituisaun nian.

Medina Lobato hatutan katak inisiativu lidera hosi CE-CPLP maka kriasaun hosi Institutu Sertifikasaun hosi Produtu Hahán sira hosi Nasaun Luzófonu sira (ICPA-CECPLP), ne'ebé nia despaxu aprova tiha ona iha loron 11 Fevereiru no sei ratifika iha reuniaun hanesan hosi diresaun nian.

Reuniaun sei hala'o hafoin Fórum Ekonómiku Globál hosi CPLP, ne'ebé sei hala'o mós iha Díli, hosi loron-kinta to'o loron-sábadu.

Nia hatutan ba Lusa katak kriasaun hosi ICPA-CECPLP haree ba importánsia hosi área transformasaun ba produtu hahán sira nian iha CPLP.

"Iha nesesidade atu fó valór ba kontributu importante liuhosi serbisu no esforsu sira ne'ebé hala'o hosi instituisaun oioin no entidade sira hosi nasaun sira CPLP nian, ba transformasaun hosi sira nia produtu nasionál, iha ámbitu ba dezenvolvimentu sosioekonómiku no emprezariál hosi komunidade no hosi «Marka CPLP» iha futuru", nia esplika.

Hanesan membru sira fundadór sira simboliza CE-CPLP, Uniaun hosi Esportadór sira CPLP nian (UE-CPLP) no Empreza Munisipál hosi Kualidade Bastos nian (EMQB), entidade ne'ebé sei prezidi Komisaun Instalador hosi institutu, liuhosi Francisco Xavier.

Medina Lobato sai hanesan visi-prezidente komisaun nian, ne'ebé nia sede sei halo iha Lisboa, hodi hein atu UE-CPLP indika reprezentante nia naran.

Lidera hosi emprezáriu mosambikanu Salimo Abdula, CE-CPLP hanesan organizasaun ida ne'ebé haree ba dezenvolvimentu hosi koperasaun entre estrutura asosiativu sira hosi nasaun-membru sira CPLP nian - Angola, Brazil, Cabo Verde, Guiné Bissau, Guiné Ekuatoriál, Mosambike, Portugal, São Tomé & Prínsipe no Timor-Leste.

Instituisaun, harii iha loron 04 Juñu 2004, iha Lisboa, hakarak mós harii kondisaun sira ba dezenvolvimentu hosi negósiu sira iha fatin ekonómiku sira ne'ebé halo parte iha fatin luzófonu.

Agora daudaun, Konfederasaun Emprezariál CPLP nian iha ona asosiadu hamutuk 117 - fundadór efetivu hamutuk 13, efetivu hamutuk 23, aderente hamutuk 78, honoráriu rua no beneméritu ida.

SAPO TL - Fonte: Lusa