Mensazen Estadu Ba PN, Posibilidade Taur Koalia Nomeasaun Major Jeneral Foun

DILI - Prezidente Republika Taur Matan Ruak husu Parlamentu Nasional (PN) atu hatoo mensazen estadu ba reprezentante povu nomos povu iha Timor Leste. Iha mensazen nee posibilidade prezidente koalia kona ba polemika nomeasaun Major Jeneral foun.

Vice Prezidente PN Adriano Nacimento hatete nia parte lahatene kontiudu mensazen estadu husi Prezidente Republika Taur Matan Ruak ba PN, maibe iha posibilidade koalia kona ba isu nasional hanesan nomeasaun major Jeneral foun iha Institusaun Falintil Forsa Defeza Timor Leste (F-FDTL).

Prezidente bele halo diskursu ou mensazen estadu ba isu-isu aktual neebe ita hotu hatene hanesan polemika kona ba troka Xefi Estadu Maior Lere ninian, neebe sai polimika boot ona tamba involve Prezidente Republika,” dehan Adriano ba STL, Tersa (23/02/2016) iha PN.

Nia hatete isu aktual neebe mak hamosu diferensia ideias no polemika bele halo esplikasaun ba publiku neebe Prezidente Republika bele koalia kona ba ida nee hotu, mais deputadu sira labele husu asuntu neebe mak Prezidente Republika Koalia liu husi mesazen estadu nian iha PN.

Iha fatin hanesan Vice Prezidente PN Aderito Hugo da Costa hetete semana nee Parlamentu sei halao plenaria ekstraordinaria hodi husik Prezidente Republika atu hatoo nia mensazen, maibe Prezidente lamensiona kontiudu husi mensazen nee.

Nune mos Prezidente PN Vicente Guterres liu husi sesaun plenaria Lee sai karta husi Prezidente Republika Taur Matan Ruak, neebe dirizi ba meja Parlamentu katak masazen estadu ba  Parlamentu Nasional  tuir artigu 86 alinea E Konstitusaun RDTL.

Vicente hatete karta husi Prezidente Republika nee konsege konvoka konferensia urzensia ho lider bankada, hodi hare karta husi Prezidente Republika no konsege aseita nunee iha loron 25 Fevereiru 2016 iha plenaria ekstra ordinaria. Informasaun kompletu iha STL jornal no STL web, edisaun Kuarta (24/2/2016). Timotio Gusmao

Suara Timor Lorosae