Australia “Naok” Osan TL Besik Bilaun 5 Husi Reseitas Petrolium no Gas

DILI - Australia durante nee naok ona povu Timor Leste (TL) nian osan besik bilaun 5 husi resitas kampu petrolium no gas, neebe pertensia ba direitu TL.

Tuir Movimentu Kontra Okupasaun Tasi Timor Juvinal Dias hateten ema Australia barak maka hanoin katak sira nia governu laran luak ba povu TL, maibe buat nee lalos desde 1999 Australia fo mais ou menus Bilaun 1.7, liu husi programa asistensia militar, mekanisme bilateral no multilateral.

Maibe durante tinan 10 resin hanesan governu Australia simu osan besik Bilaun 5 husi resitas sira hanesan kampu petrolium no gas, neebe pertensia ba direitu Timor, tamba nee liu bilaun tolu neebe Timor Leste fo ona ba Australia, halo povu Timor maka sai Australia nia doador boot liu, laos Australia maka Timor nia doador. Ho buat injustica neebe Timor infrenta hela husi okupasaun Australia nia ba Tasi Timor, nunee movimentu kontra okupasaun Tasi Timor husu ba Governu Australia, hodi hamutuk ho Timor Leste rezolve problema maritima ho ulun malirin,” hateten Juvinal, liu husi lee deklarsaun fronteira Tasi Timor, wainhira halao asaun demostrasaun, iha Embaixada Australia oin, Fatuhada, Dili, Tersa (23/02/2016).

Nia hatutan liu tinan 40 ona Australia goza rekursu minarai no tasi, iha area Tasi Timor neebe lolos tuir lei no prinsipiu internasional pertensia ba TL. Iha inisiu Australia buka argumentu oi-oin, atu justifika sira nia kanten, hanesan iha 1972 Australia halo akordu ho indonesia atu difini sira nia fronteira, argumentu falsu ba plataforma kontinental halo sira okupa no domina no naok povu TL nia riku soin.

Iha fatin hanesan Prezidente Komite 12 Novembru Gregorio Saldanha hateten Rezistensia povu kiik TL neebe hahu iha tinan 1975, hodi kore aan husi okupasaun ilegal estranjeiru la dauk too nia rohan. Informasaun kompletu iha STL jornal no STL web, edisaun Kuarta (24/2/2016). Joao Anibal

Suara Timor Lorosae