PR TAUR HO GOVERNU PRONTU HAKOTU POLÉMIKA EZONERASAUN

Prezidenti Repúblika (PR) ho Governu konkorda ona atu hakotu tensaun polítika kona-ba ezonerasaun Xefi Estadu Maior Falintil Forsa Defeza Timor Leste (F-FDTL), Maijor Jeneral Lere Anan Timor, ne’ebé hamosu ona polémika bo’ot entre órgaun soberanus tolu (Prezidenti Repúblika, Governu no Parlamentu Nasionál).

Ministru Defeza, Cirilo Cristovão informa katak, Governu ho Prezidenti Repúblika (PR) sei tuur hamutuk hodi buka dalan kona-ba ezonerasaun Jeneral Lere Anan Timur nian.

“Ami ko’alia oituan kona-ba kestaun ne’e (ezonerasaun), ami sei buka dalan atu hetan solusaun para atu rezolve problema ne’e. Prezidenti Repúblika mós hateten katak, laiha problema, Governu ho Prezidenti tuur atu buka dalan ba ida ne’e,” informa Cirilo Cristovão hafoin akompaiña Primeiru Ministru Rui Maria de Araújo hodi enkontru ho Prezidenti Repúblika Taur Matan Ruak, Segunda (29/02).

Nia haktuir, iha sorumutu ne’e, sira ko’alia kona-ba ezonerasaun ba Jeneral Lere, ne’ebé oras ne’e dada’uk sai polémika bo’ot entre Prezidenti Repúblika ho Governu i Parlamentu Nasionál (PN).

“Prezidenti Repúblika mak bolu ha’u ho Primeiru Ministru, atu mai relata dezenvolvimentu nasaun nian, hanesan Ministériu Defeza, haree mós dezenvolvimentu forsa nian,” katak nia.

Cirilo Cristovão esklarese, Governu hatama ona kontinsiozu administrativu ba Tribunal Rekursu, hodi halo interpretasaun ba desizaun Prezidenti Repúblika nian tuir lei.

“Nia (Tribunal Rekursu) mak sei desidi ita hein de’it, maibé husi parte seluk mós Prezidenti Repúblika sempre nakloke-an, atu buka solusaun ba problema ne’e,”informa Cirilo.

Nia esklarese, karta ne’ebé mak Governu hatama ona ba Tribunal Rekursu ne’e, mantein nafatin ho proposta ne’ebé mak iha.

Iha okaziaun ne’e mós, Brigadeiru Jeneral Filomeno Paixão hasoru malu ho Prezidenti Repúblika Taur Matan Ruak, maibé hafoin enkontru, Filomeno Paixão taka ibun ba média.cos

Jornal Nacional