Laiha Provas, TR Absolve Izaura Husi Krime Trafiku Umanu

DILI - Tribunal Rekursu absolve hikas kondenada Izaura Landos Bobi husi primeiru transitu julgadu Tribunal Distrital Dili nian, tanba arguida laiha provas komete krime refere.

Tuir infromasaun husi defensor publiku Manuel Exposto katak, nia kliente Izaura Landos Bobi tribunal absolve tiha ona. Iha loron Kuarta (18/5) Izaura ba hasoru nia hodi dehan rekursu neebe mak halo ba nia, desizaun mak absolve. Neebe oras nee nia kliente nee hetan ona liberdade iha komunidade nia let, tanba nia la prova komete krime refere hasoru lezada sira.

Eis kondenada nee hetan pena prizaun tinan hitu (7) husi leitura akordaun TDD nian iha loron (01/03/2016). Faktus iha akuzasaun Ministeriu Publiku provadu hotu katak arguida Izaura Landos Bobi provadu iha tinan 2014 bosok vitima sira hodi dehan trata pasaporta hodi ba servisu iha Inglatera.

Nunee lezada sira mos halo tuir hodi husu osan ba sira nia familia hodi fo osan ba trata pasaporte. Nunee iha loron 19 de Julu 2015 arguida lori lezada sira ba iha Aeroporto no la konsege sai tanba  lezada sira laiha osan atu sosa bilete aviaun ho folin $2500. Neemak polisia imigrasaun ba halo kapturasaun ba sira, no momentu nee arguida rasik nia pasaporte laiha. Ho hahalok sira nee, arguida imputa duni provas neebe mak iha akuzasaun nia laran.

Iha alegasaun final MP deklara, arguida Izaura Landos Bobi iha tinan 2014 bosok vitima sira hodi dehan trata pasaporta hodi ba servisu iha Inglatera. Nunee lezada sira mos halo tuir hodi husu osan ba sira nia familia hodi fo osan ba trata pasaporte. Arguida mos dehan nia bin naran Fidelia hela iha Lisboa, no nia maun naran Arsenio mak sei suporta sira ba servisu iha Inglatera. Ho ida nee lezada sira mos fiar deit. Nunee iha loron 19 de Julu 2019 arguida lori lezada sira ba iha aeroporto, lezada sira laiha osan atu sosa bilete aviaun ho folin $2500 hodi sira la konsege sa aviaun. Iha loron neemak polisia imigrasaun ba halo kapturasaun ba sira, no arguida rasik nia pasaporte laiha. Ho hahalok sira nee, arguida imputa duni provas neebe mak iha akuzasaun nia laran.Ho Ida nee Ministeriu Publiku husu ba tribunal atu aplika pena prizaun tinan 12 ba arguida.

Entertantu parte defesa husu ba tribunal atu absolve arguida husi krime nee. Tanba arguida laos halo krime nee ho forma organizadu, maibe nia informa ba nia kolega sira. Tanba arguida hela iha lezada balun sira nia uma, tanba nia inan aman mate hotu ona. Depois trata tiha pasaporte no BI, lezada Ida-idak hela iha sira nia uma. Iha faktus nee arguida la organiza lezada sira iha nia fatin hodi ba Inglatera, maib arguida hamutuk iha lezada sira nia fatin. Ho ida nee parte defesa husu ba tribunal atu absolve arguida husi krime nee. Informasaun kompletu iha STL Jornal no STL Web, edisaun Tersa (24/5/2016). Domingas Gomes

Suara Timor Lorosae