Fakar Tua Ba PM, Atinu-Ato Tama Prizaun

DILI - Tribunal Distrital Dili (TDD) aplika pena prizaun preventiva ba arguidu Martinho no Antonio, tanba hatudu arguidu nain rua fakar serveza ba Primeiru Ministru Rui Maria Araujo bainhira halao hela exersisiu.

Tuir informasaun husi offisial justisa katak, desizaun nee tribunal aplika liu husi rejultadu primeiru interogatoriu neebe halao iha TDD, iha loron Sabadu (21/05). Arguidu nain rua Ministeriu Publiku akuza ho krime atentadu hasoru orgaun soberanu nia reprezentante masimu tuir artigu 203 kodiku penal TL.

Iha alinea premeiru katak, ema neebe halo atentadu hasoru orgaun soberanu nia reprezentante masimu ka ema neebe tuir konstituisaun subtitui nia, ka ema neebe hetan tiha ona nomeasaun maibe seidauk simu pose ba kargu nee, sei hetan pena tinan 8 too tinan 20.

Medidas koasaun neebe Tribunal aplika ba arguidu nain rua nee, nudar meus atu eduka arguidu nain sira para labele kontinua tan asaun hanesan iha futuru. Tan nee, maske arguidu nain rua tama prizaun, maibe investigasaun ba kazu nee kontinua lao. Nunee bainhira iha indisiu forte, kazu nee sei kontinua lao. Karik evidensia la forte, bele taka kazu refere.

Arguidu nain rua antes nee komete ona krime droga hamutuk ho arguidu Afuku hodi tama prizaun Becora. Foin sai la kleur, sira nain rua kontinua tan ho krime foun. Nia konsikuensia maka arguidu nain rua tenki kumpri medidas koasaun prizaun preventiva iha prizaun Becora, mais nia prosesu investigasaun sei kontinua lao. Informasaun kompletu iha STL Jornal no STL Web, edisaun Tersa (24/5/2016). Domingas Gomes

Suara Timor Lorosae