Naok Sasan Igreja, Key Tama Prizaun

DILI - Arguidu ho naran MFS alias Key, tama prizaun preventiva tanba deskonfia naok sasan konstrusaun Igreja Aimutin nian.

Liu husi primeiru interogatoriu neebe halao iha Tribunal Distrital Dili, iha  loron (19/05) tribunal aplika pena prizaun preventiva ba arguidu refere.

Tuir informasaun husi offisial justisa katak, sasan neebe mak deskonfia arguidu naok mak hanesan besi ho semente neebe atu halo igreja Aimutin nian. Arguidu naok material hirak nee ho kuantidade barak hodi ba faan tiha ba ema balun hodi hola tiha. Ho arguidu nia hahalok MP akuza arguidu komete krime furtu agravadu neebe previstu iha artigu 252, kodigu penal Timor-Leste.

Arguidu nee PNTL, liu husi Unidade Servisu Investigasaun Kriminal Nasional (SIKN) kaptura iha Heliport Bairo Pite besik Palasiu Prezidensial nia sorin iha Segunda (16/05), tanba deskonfia liman lais ka naok ten ba material konstrusaun Igreja Aimutin.

Antes nee iha loron Tersa (03/05/2016), liu husi prosesu primeiru interogatoriu tribunal aplika TIR ka aprezentasaun periodika fulan ida dala rua ba arguidu MFS ho MB nomos FG. Tanba deskonfia hanesan autor hana ema ihakalan-kalan ho rama ambon. Nunee arguidu nain tolu nee deskonfia komete krime homesidu agravadu neebe mak ministeriu publiku akuza ba sira.

Liu husi primeiru interogatoriu nee TDD , deside arguidu nain tolu halo aprezentasaun periodika fulan ida dala rua ba iha Komando Polisia sira hodi hein prosesu investigasaun tuir mai. Prosesu refere sei lao hela, arguidu MFS komete fali tan krime furtu agravadu ka naok sasan igreja nian hanesan besi ho semente neebe kuantidade barak tebes. Informasaun kompletu iha STL Jornal no STL Web, edisaun Tersa (24/5/2016). Domingas Gomes

Suara Timor Lorosae