KAZU ELEMENTU PNTL TIRU F-FDTL, PN HUSU REZOLVE ULUN MALIRIN

KOMANDO PNTL HUSU DESKULPA

Vise Prezidente Parlamentu Nasional (PN), Eduardo Barreto de Jesus ‘Dusae’, husu lideransa instituisaun  PNTL no F-FDTL atu buka rezolve ho ulun malirin ba kazu elementu Polisia tiru membru F-FDTL, ne’ebé akontese iha Munisípiu Ainaro Sesta (26/08).

“Akontese iha Ainaro ne’e buat ki’ikoan, ita labele foti buat ne’e sai bo’ot, presiza lideransa husi instituisaun rua ne’e ulun fatuk malirin rezolve problema  ne’e,”esplika  Dusae, ba jornalista  iha Dom Bosco, Comoro, Sabadu (27/08).

Nia dehan,  labele  problema kiikoan iha Ainaro dehan nasaun nakdoko ona, karik problema ne’e akontese  karik  edukasaun la to’o mosu buat sira hanesan ne’e. Ne’ebé fo kompetensia ba instituisaun rua atu rezolve.

“Ha’u fiar maun bo’ot Lere Anan Timur no Komandante Jeral PNTL, atu haree buat sira ne’e hotu, ne’ebé la’os buat bo’ot kompetensia sira nain rua atu haree,”dehan nia.

Problema entre membru instituisaun rua ne’e sempre akontese hela deit?  Dusae dehan, nia foin rona kazu Ainaro ninian ne’e.  La  iha efeitu ruma afeta ba estabilidade nasional, funsionamentu  Estadu ne’e la’o didiak hela, buat kiikoan ne’ebé maka akontese, buka para rezolve.

Iha parte seluk oan mane Saudozu Sub Xefi  Estadu Maior FALINTIL, David Alex  ‘Daitula’ Alex Daitula Junior, hatete, hanesan  Veteranu  ida ninia oan atu husu ba instituisaun rua ne’e kontinua mantein sira ninia pozisaun  hanesan lutu ba nasaun ida ne’e,  porque laiha razaun ida, tanba atetude elementu sira nian lori instituisaun rua  ne’e tama ba  iha  ambiente konflitu nia laran hodi fo implikasaun  estabilidade nasaun.

“Ha’u hakarak alerta ba  instituisaun rua ne’e,   liu-liu ba Estadu Timor atu mensiona rekrutamentu, tenki buka ema ninia pasadu liga ho Timor ba nasaun ida ne’e nian, se lae ita raut deit ema tanba nasaun demokrasia,   ita raut deit ema tanba rekonsiliasaun,  tau  iha instituisaun ne’ebé maka importante sira ne’e,   depois ema sira la iha sentiment ida atu fo ninia kontribusiaun masimu ba Estadu  no nasaun ida ne’e,  mas sira ninia hanoin  ne’e maka atu oinsa buka deit aporveita  benefisiu husi instituisaun ne’ebé maka nia halao kna’ar ba,”dehan Daitula Junior.

Relasiona ho kazu ne’ebé maka akontese,  Daitula Junior, husu atu halo investigasaun imediatamente hodi deskobre kronolojia  ba problema ne’e.

Nia dehan,  tuir regra militar ninian Polisia ka militar ne’ebé maka tiru deit indisiplinar tiha ona.

“Ha’u husu ba instituisaun rua ne’e atu halo investigasaun, depois de investigasaun ne’e la’o tiha,  ninia relatoriu iha labele fo desizaun ne’ebé mai ho ita ninia fuan, maibe desizaun ne’e tenki aplika ho lei iha instituisaun rua ne’e ninian.    Ba ha’u  diak liu ema sira hanesan ne’e sai tiha deit,  hodi prosesu  tuir lei ne’ebé maka iha,”dehan Daitula Junior.

Tenki prosesa ba justisa

Nune’e mos, Diretor Asia Justice And Rights (AJAR), Jose Luis de  Oliveira, hatete, kazu ne’ebé akontese iha Munisípiu Ainaro, Sesta (26/08), ne’ebé membru  PNTL Sarjentu Hermenegildo do Rosario hemu lanu hodi  lori pistola tiru membru F-FDTL, Lázaro José da Costa  (Alau), tenki prosesa kazu ne’e ba oin, tanba ne’e krimi.

“Ba akontesimentu ida ne’e ami hanoin tenki aplika sansaun disiplinar ba membru polisia ne’ebe tiru membru F-FDTL ne’e no lori mos kazu ne’e ba tribunal tanba hahalok ne’e krimi, lori pistola tiru ema,” hatete Diretor AJAR ne’e ba JN-Diário, liu husi telefone iha nia serbisu fatin, Domingo (28/08).

Tuir Diretor AJAR ne’e katak, kazu sira forsa ho seguransa  halo agresaun fiziku ba malu ne’e akontese bebeik ona, ho ne’e husu ba intituisaun no politiku sira atu haree ba kestaun ida ne’e. no se bele ba polisia atu muda ka troka tiha maneira formasaun ne’e tanba formasaun sira ne’e halo membru polisia sira hanoin mak problema hela deit.

Tuir kronolojia ba akontesimentu ne’e katak, bainhira membru PNTL Sargento Hermenegildo do Rosario husi Unidade Polisia Komunitaria  ho kondisaun lanu ba partisipa iha expozisaun ka feira 20  Agosto iha Ainaro vila iha Sesta (26/08) kalan ne’e, hafoin mosu disksaun ho membru F-FDTL ne’e, nune’e forsa ne’e tuku polisia no monu ba rai hodi polisia ne’e hader mai hasai pistola hodi tiru kedas forsa ne’e nia kabun.

Komandu PNTL husu deskulpa

Iha loron Sesta, (26/8/2016) mais ou menus tuku 10:00 kalan,  elementu Polisia Nasional Timor Leste (PNTL) husi Unidade Polisia Komunitaria, sargento Hermenegildo do Rosario tiru kanek membru Falintil-Forsa Defeza de Timor- Leste (F-FDTL) iha Munisipiu Ainaro.

Husi akontesimentu ne’e, rezulta membru F-FDTL ida ho naran Lázaro José da Costa  “Alau” husi Postu Admnistrativu Laga, Munisípiu Baucau hetan kanek todan iha parte kabun no membru ne’e agora dadauk baixa hela iha sala Intensive Care Unit (ICU) Hospital Nasional Guido Valadares (HNGV).

Relasiona ho kazu ne’e, komandante Jeral PNTL, komisario Julio Hornay hodi komando PNTL nia naran husu kedas deskulpa ba komando F-FDTL li-liu ba familia vitima nian.

“Hodi komando nia naran husu deskulpa ba komando F-FDTL especial ba familia vitima ba atetudi ami nia membru nian. Iha biban ida ne’e mos atu informa katak komando forsa rua Estado nian apar ho insidente ne’ebe mosu iha loron Sesta (26/08/2016), kalan tuku 21:30 otl, iha feira ne’ebe mak organiza husi Ministeriu Administrasaun Estatal (MAE), iha Munisipiu Ainaro,” hateten Komandante Jeral PNTL, Julio Hornay liu husi konferensia ba imprensa konjunta entre komando PNTL no F-FDTL iha Quartel Geral, Fatuhada, Dili, Sabado (27/08/2016).

Julio Hornay hatutan, Estado Major General ho komando jeral PNTL konsidera insidente ne’e hanesan insidente ne’ebe involve individu ka oknum PNTL nudar suspeito no individu F-FDTL nian nudar vitima, la’os insidente entre F-FDTL no PNTL hanesan instituisaun Estado nian.

“Ba kazu ne’e komando PNTL foti ona medidas kautelares ba membru PNTL refere, tuir relatorio komando municipiu Ainaro membru refere detein ona iha sela PNTL, municipiu Dili no iha loron Domingo (28/08/2016) hodi ba halo primeiru interogatorio iha tribunal municipiu Covalima. Alende ida ne’e parti disiplina komando foti ona medidas kautelar ka suspensaun preventiva signifika membru refere dezarmadu kedas, desfardadu no hases husi serbisu hodi atende prosesu kriminal,” afirma Julio Hornai.

Iha biban ida ne’e, komando rua husu ba komando municipais hotu, diresoens suberdinadu atu kontinua hala’o nia kna’ar Estado nian halo serbisu normal hanesan bai-bain, hodi asegura nafatin prestasaun serbisu ba komunidade iha teritorio Timor laran tomak no garante nafatin serbisu masimu entre instituisaun rua iha terenu.

“Husu ba membrus tomak atu servi povu ho dignu, onestu no professional tuir lei no regras serbisu ne’ebe vigora, tama iha instituisaun seguransa la’os atu aproveita hala’o violasaun ka torturasaun hanesan ema bandalismu sira, maibe tama instituisaun ida ne’e atu serve povu no nasaun ida ne’e, ne’ebe nia povu sosa ho isin no ran. Instituisaun sei la lakon buat ida bainhira hasai nia membrus sira ne’ebe lamerese ona atu hala’o serbisu iha instituisaun ida ne’e, tanba joven barak maka hein hela iha liur,” dehan nia.

Komjer ne’e rezeita informasaun iha publiku katak, F-FDTL no PNTL iha municipiu Ainaro, ne’e lalos, lolos maka membru PNTL ida tiru membru F-FDTL ida, ho akontesementu ne’e komando rua kontak ba malu hodi kontrola sira nia membru hodi normaliza situasaun iha fatin refere.

“Komando promete sei hasai duni husi instituisaun, tanba atuasaun ne’ebe nia komete grave, laserve atu servi instituisaun ida ne’e, instituisaun ida ne’e digno Estado ninian, atu servi ninia dignu no professional, la marese ita tenke sai duni para instituisaun ne’e prestiju diak,” dehan Julio.

Julio apela, Ba se deit maka hakarak koko atu viola ka utiliza sala ekipamentus seguransa nian maka nia mos pronto atu hasoru iha prosesu kriminal iha tribunal no mos prosesu disiplina iha instituisaun ninian.

Iha fatin hanesan, Vice xefi Estado Maior das F-FDTL, Brigadeiro General, Filomeno da Paixão de Jesus dehan, komando F-FDTL mos kondena maka’as atetudi membru PNTL nian ne’ebe husu atu aplika medidas forte.

“Ba komando F-FDTL principiu Estado tenke as teb-tebes, ita nia povu ne’e presija seguransa hodi nune’e bele hetan dezenvolvimentu, instituisaun rua, PNTL no F-FDTL kompleta malu tuir Sistema seguransa nasional hodi fo seguransa ba nasaun tantu interna no externa, hodi nune’e povu bele la’o livre, la’os situasaun mosu hanesan ne’e para depois instituisaun rua aproveita fali oportunidade ida ne’e kria kolizasaun at liu tan,” dehan Brigadeiro.

Iha biban ida ne’e, Brigadeiro General apela ba media sira atu fo informasaun klaru ba publiku, se lae maka Terceira pessoa bele aproveita oportunu lori emagen at ba nasaun seluk.

“Hau hakarak dehan, situasaun ida ne’ebe mosu to’o agora, la’os situasaun ida ho abut foin mak nurak ita hakiduk oitoan ba iha tinan 2006, presija ita hare fali ba kotuk, depois ita esplika saida mak agora mosu. Instituisaun rua ne’e tur ho seriu hanoin hodi redisiplina ba ninia membru sira, reve regras ne’ebe mak fo dadauk,” dehan Filomeno.

Iha biban ida ne’e komando rua deklara katak situasaun atual iha Municipiu Ainaro kontroladu.

Membru F-FDTL baixa iha ICU

Tuir mediku especialista Doutor Alito Soares katak, membru ne’e evakua mai to’o iha HNGV tuku 5:00 dader, depois mediku ekipa cerugia sira halo kedas operasaun, tanba nia hetan kanek iha hirus matan depois kona mos nia tee oan boot.

“Pasiente  ne’e hetan tiru kanek iha hirus matan parte liman los tama to’o nia nia estomuk no kona mos nia te oan bo’ot, ho kondisaun ida ne’e entaun doutor ekipa cerugia halo kedas opera ba pasiente ne’e,” informa Doutor Alito Soares ba jornalista sira iha HNGV, Sabado (27/8/2016).

Doutor Alito realsa, membru F-FDTL ne’e nia kondisaun diak no agora nia baixa iha ICU.

“Pasiente nia kondisaun rekopera ona, agora toba hela iha ICU,” dehan nia.

Tuir observasaun JN-Diario iha HNGV katak, mediku ekipa cerugia sira halo operasaun ba membru F-FDTL ne’e kuaze oras tolu nia laran hahu husi tuku 6:00 to’o 9:00 dader, hafoin operasaun pasiente lori kedas ba iha sala ICU hodi hetan tratamentu.ekipa JN-Diário.

Jornal Nacional