Delimitasaun Fronteira Marítima Nu’udar Prioridade Nasionál

DILI, (ANTIL) – Repúblika Demokratika Timor-Leste (RDTL) kontinua luta hodi hamosu konkordansia nu’udar etapa daruak ba reinvindikasaun atu kompleta soberania nasaun ne’e nian mai ho prioridade nasionál mak delimitasaun ba fronteira marítima.

”Delimitasaun fronteira marítima sai nu’udar prioridade nasionál ida no ita hotu mós konkorda, ida  ne’e nu’udar segunda etapa ba reinvindikasaun soberania ita nia rain ninian”, Primeiru-Ministru, Rui Maria de Araújo hatete bainhira lansa dokumentu fronteira marítima ne’ebé deskreve pozisaun Timor-Leste ninian ho relasaun delimitasaun definitiva fronteira marítima iha Ministériu Negósiu Estranjeiru no Koperasaun (MNEK), Segunda, (29/8).

Fronteira marítima kestaun ida atu kompleta soberania TL. “Kona-ba kestaun marítima ne’ebé hala’o iha tinan balun liu ba, nasaun, estadu no governu nia lideransa determina katak ita presiza hahú fila fali ita nia prosesu negosiasaun ba ita nia fronteira tasi Timor”, Xefi Governu ne’e hatutan.

Timor-Leste ho Indonézia iha ona konkordánsia no prinsípiu atu hahú ko’alia kona-ba fronteira marítima. Ho Austrália, TL susar tebes atu hetan akordu no prinsípiu ida atu hahú ko’alia kona-ba fronteira marítima.

Liu-hosi prosesu sira ne’e hotu, TL iha 11 Abril 2016 aprezenta liuhusi mekanizmu konsiliasaun obrigatória ne’ebé konvensaun nasaun unida ba tasi Timor kontempla espesífikamente ba situasaun ne’ebé TL enfrenta.

Iha situasaun ne’ebé nasaun rua reklama hanesan ba fronteira marítima, nia hatete, normalmente mekanizmu arbitrajen, maibé infelizmente Austrália retira-án iha rezolusaun konflitu, nune’e TL hili opsaun seluk no rekore ba konvensaun nasaun unidu nian ne’ebé hanaran konsiliasaun obrigatória.

”Mekanizmu ida ne’e, parte rua eskolla konsiliadór sira, na’in ruarua no sira na’in haat mak depois konsiliadór ida númeru cinco hodi sai prezidente ba konsiliasaun”, nia esplika.

Hafoin lansamentu ba dokumentu fronteira marítima ne’e, eis Ministru Saúde lejislatura dahuluk ne’e inklui membru governu, sosiedade sivil, relijiosa sira nomós partisipante sira asiste diretamente transmisaun direita kona-ba argumentasaun legál TL nian hasoru Austrália iha Haia, Olanda. (jornalista: Rafy Belo; editora: Rita Almeida)

Foto: Primeiru-Ministru, Rui Maria de Araújo iha lansamentu dokumentu fronteira marítima iha Ministériu Negósiu Estranjeiru no Koperasaun (MNEK), Segunda, (29/8). Foto GPM