SALÁRIU PESOAL SANEAMENTU LARGO LECIDERE, LA KONDIZ HO VOLUME SERVISU

Knaar servisu hanesan pesoal saneamentu ne’e servisu ida ne’ebé kategoria todan, tanba lixu kada minutu no kada oras sempre butuk. Mezmu ekipa saneamentu hamoos tiha ona, maibé realidade saláriu kada fulan ba pesoal saneamentu Largo Lecidere ninian no em jerál, la sufisiente ba pesoal ida-idak hodi sustenta nesesidade familia ninian.

Maski ho saláriu ne’ebé la balansu ho volume serbisu, maibé pesoal saneamentu mós espresa katak, sira sente triste kahor mós ho kontente.

“Ha’u sente kontenti no senti di’ak konabá servisu ida ne’e, tanba Governu Timor-Leste (TL) liu husi Ministeriu Administrasaun Estatal (MAE) loke ona matan ba kompañia LABILAY, hodi ami nain hira ne’e halao servisu hanesan pesoal saneamentu iha Largo Lecidere hodi sustenta nesesidade familia ninian. Mezmu saláriu ne’ebé maka ami simu la boot ninia volume la hanesan ho ami nia servisu ne’ebé maka iha. Maib’e sente kontente tanba bele hetan netik serbisu”, pesoal saneamentu Largo Lecidere, Titi Simões ba JN-Semanário iha Lecidere-Díli, Sesta (26/08/2016).

Saláriu ne’ebé Titi tenki simu husi Kompañia kada fulan maka, $115.

“Osan ne’e la to’o kompara ho servisu ne’ebé ami hala’o ne’e todan liu fali kuantidade osan ne’ebé maka ami simu kada fulan,” Titi Simões hateten.

Nia esplika, tanba tuir orariu servisu ne’e husi kompañia ninian katak, oras tama servisu hahú tuku 08:00 Oras Timor-Leste (OTL) to’o meiudia deskansa fali, depois komesa fali husi tuku 13:00-16:00 OTL maka deskansa fali.

“Salariu ne’e sufisiente entaun ha’u dalaruma tenki deve hodi bele sustenta nesesidade uma laran no oan mane na’in 3 ne’ebé maka kontinua estudu iha Universidade Díli (UNDIL), Universidade da Paz (UNPAZ) no Universidade Oriental (UNITAL), to’o osan iha fali maka selu nei-neik,” dehan Pesoal Saneamentu Largo Lecidere ne’e.

Nia ho triste hateten tan katak, maski oan nain tolu eskola hotu iha universidade maibé katuas oan mós oras ne’e dadaun nia kondisaun saude la permiti ona atu halo serbisu ne’ebé todan.

“Ita nia oan sira ne’ebé maka lor-loron mai uza Largo Lecidere ne’e, sira laiha sentimentu atu ajuda ami asegura lixu sira ne’ebé maka sira produz, tanba sira haan iha buat ruma iha tuur fatin, sira soe buat kulit sira ne’e fatin ne’ebé maka sira tuur ba, i dalaruma ami hasee sira atu tau lixu iha ninia fatin, sira dehan ami soe foer arbiru iha ne’e para tia sira manan osan,” Titi Simões hateten.

Entretantu tuir Pesoal Saneamentu Largo Lecidere, Jacinta Soares hateten, senti la satisfeitu ho salariu ne’ebé maka kompañia LABILAY fó mai kada pesoal saneamentu Largo Lecidere nian.

“Saláriu kada fulan $115 ne’ebé maka kompaña LABILAY oferese mai ami ne’e la kondiz ho volume servisu ne’ebé maka ami halo, no kuantidade osan $115 ne’e kompara ho kuantidade nesesidade ne’ebé presiza husi oan nain 6 ne’e laiha balansu, nune’e ita senti moris ne’e todan oituan tanba salariu ne’ebé ita iha labele taka koak sira ne’ebé maka iha,”nia dehan.ves

Jornal Nacional