segunda-feira, 29 de agosto de 2016

Vulkaun indonéziu Sinabung hasai suar no sinza to’o altura km 3


Vulkaun Sinabung, ida ne’ebé mós ativu liu iha illa indonézia, iha Samatra, hasai suar no sinza to’o distánsia kilómetru tolu resin hosi kuak, halo ezérsitu prepara eventuál evakuasaun aldeia sira ne’ebé besik, informa ohin 'media' lokál sira.

Autoridade sira taka asesu ba dalan prinsipál rua ba zona ne’e, klasifika hanesan mean tanba perigu, no bele hahú evakuasaun ba pelumenus povoasaun lima ne’ebé hela iha foho hun.

"Ami kontinua fó hanoin no hasai ema sira ne’ebé tama iha zona mean", tenik komandante estasaun Foho Sinabung nian, Agustatius Sitepu, ba portál notísia Tempu.

Sinabung hahú provoka ba dala uluk iha fulan-agostu 2010 hafoin toba durante tinan 400.

Horikedas setembru 2013 hatudu beibeik atividade maka’as.

Erupsaun vulkánika sira uluk provoka problema ba tráfegu aéreu iha rejiaun no kauza vítima mortál.

Iha fulan-maiu nia rohan, pelumenus ema na’in hitu mate, enkuantu iha fevereiru kontabiliza vítima mortál 16 tanba forte erupsaun ne’ebé obriga tenke hasai ema rihun 14.

Indonézia hatuur iha ida be hanaran Anel de Fogo do Pacífico, área ho atividade sízmika no vulkánika maka’as, simu vulkaun 400 resin, hosi sira ne’e pelumenus 129 kontinua ativu no 65 kualifikadu hanesan perigozu, inklui Sinabung.

SAPO TL ho Lusa

Sem comentários: