segunda-feira, 29 de agosto de 2016

DIT FC Lolo Kablaki 10-1


DILI,  (ANTIL) - Tikete ba meias finais iha tiha ona DIT FC nia liman. Prezente ida ne’e sira hetan hafoin lolo Kablaki FC 10-1 iha Tasa 12 Novembru 2016.

Jogu ekipa rua ne’ebé hala’o iha Estádiu Municipál Dili, Sesta (26/8) ne’e kuaze laiha balansu. Hosi primeira parte to’o segunda parte, DIT domina bola no hosi rezultadu domina bola ne’e konsege lees Kablaki 10-1.

Golu 10 ne’e atribui hosi jogadór sira hanesan Filipe Oliveira (13) iha minutu 12, Celso Garcia (21) iha minutu 26, José Santos (7) iha minutu 57, José Santos (7) iha minutu 67, Fransyatma Kefy (10) iha minutu 71, José Fonseca (23) iha minutu 82, Henrique Martins (11) iha minutu 83, Gaudêncio Monteiro (20) iha minutu 86, Henrique Martins (11) iha minutu 88, Henrique Martins (11) iha minutu 89.

Entretantu, golu ida hosi Kablaki oferta hosi Manuel Geraldo (11) iha minutu 40 liuhusi penaltu. Kablaki problema ho lini jogadór. Sira nia avansadu no defeza fraku tebes, nune’e sira hetan derota ida demaziadu.

Oportunidade ne’ebé sira hetan labele ezekuta ho di’ak tanba avansadu la unidu (kompak) tan ne’e sempre falla pasajen iha grandeia adversáriu. Hosi parte defeza mós fraku tanba la konsege kaer avansadu adversáriu ho metin entaun hosi minutu ba minutu sempre akontese asaltu iha sira nia grandeia.

Oras ne’e, DIT FC hein AS Ponta Leste, FC Académica no Cacusan CF iha meias finais. Entre klubu tolu ne’e, sé maka pasa sei hasoru DIT FC iha meias finais.

Formasaun Jogadór

DIT FC (4-1-4-1) - Otilio Guterres (30/bal), Ervinho Soares (77/def), Bermadino Sena (3)/def), Orcelio da Silva (2/def), José Fonseca (23/def), Filipe Oliveira (23/def), Antoninho da Cruz (16/med), José Santos (7/med), Fransyatma Kefi (10/med), Celso Garcia (21/avd) no Gaudêncio Monteiro (20/avd). Jogadór suplente ne’ebé tún kampu maka hanesan Mariano Pinto (18) troka 16, Henrique Martins troka (11) troka 7, Melcior Ribeiro (7) troka 21, Ramos Machances (12) troka 30. Treinadór: Manuel Pinto.

Kablaki FC (4-2-3-1) - Sano Macari (1/def), Antoninho Barreto (6/def), David Mendonça (12/def), Dilson Cárceres (4/def), Mateus Lasata (16/def), Olegário Nunes (15/med), Lino Pinto (8/med), Ezequiel Belo (17/med), Atanacio da Costa (14/med), Manuel Geraldo (11/avd) no Oscar Sarmento (5/avd). Jogadór suplente ne’ebé tún joga maka hanesan Elsio de Jesus (3) troka 15, Jenivio (18) troka 16, Luís André (10) troka 11 no Pedro da Costa (13) troka (6). Treinadór: João Godinho.

Árbitru: Nívio Fernandes
Juiz liña 1: Francisco Pereira
Juiz liña 2: Filomeno da Silva

(Jornalista: Xisto Freitas)

Foto: Jogadór DIT FC lori hela bola ba área defeza adversáriu. Foto ANTIL/Xisto Freitas

Sem comentários: