DATA ELEISAUN 2017, PREZIDENSIÁL 20 MARSU, PARLAMENTAR 8 JULLU

Prezidenti Repúblika (PR), Taur Matan Ruak, konvida Primeiru Ministru (PM) Rui Maria de Araújo, no reprezentante Partidus Polítikus (PARPOL) ne’ebé hetan asentu iha Parlamentu Nasionál (PN), hodi deskuti no desidi data eleisaun Prezidensial no Parlamentar ne’ebé sei hala’o iha 2017.

Sorumutu Xefi Estadu ho ukun na’in sira ne’e, hala’o iha oras ne’ebé mak la hanesan, maibé konsege hamosu opsaun balun liu-liu konaba data festa demokrasia iha tinan oin.

Nai ulun sira ne’e, desidi katak, eleisaun Prezidensial nian sei monu iha loron 20 Marsu, no eleisaun Parlamentar sei monu iha 8 Jullu 2017.

Primeiru Ministru (PM), Rui Maria de Araújo informa katak, Prezidenti Repúblika mak konvoka reuniaun ho Governu, nomós órgaun soberania sira seluk, inklui mós partidu polítiku sira atu ko’alia konaba data eleisaun Prezidensiál no mós Parlamentar iha tinan oin.

“Husi perspetiva Governu, aprezenta pontu sira ne’ebé, li-liu relasiona ho Lei eleisaun ne’ebé iha, prazu sira ne’ebé defini tiha ona, hato’o mós ba Prezidenti kona ba resensiamentu eleitoral ne’ebé la’o hela, la’os de’it iha Timor Leste, maibé iha mós estranjeiru,” informa PM Rui Araújo ba jornalista sira iha Palácio Prezidensial Repúblika Nicolau Lobato Aitarak Laran Díli, Segunda (12/12).

Rui Araújo afirma katak, preparasaun ne’ebé STAE mós hala’o hela agora dada’uk ne’e, para infrenta eleisaun tinan oin. Tanba ne’e, Governu  propoin mós data alternativas, depois Prezidenti Repúblika mak sei desidi atu marka data ida ne’ebé.

Xefi Governu ne’e esklarese, resensiamentu eleitoral iha estranjeiru, halo iha nasaun rua hanesan, Portugal ho Australia, maibé konaba data ikus ba resensiamentu tantu iha rai laran no rai liur (Portugal no Australia, red) sei termina iha 30 de Dezembru 2016.

Alénde ne’e, Prezidenti Partidu FRENTI MUDANÇA, José Luis Guterres informa katak,  PR Taur Matan Ruak, konvida bankada parlamentares halo enkontru atu desidi data eleisaun prezidensiais no parlamentar nian iha tinan oin.

“Ami mós iha Parlamentu Nasionál, konsulta malu konaba data, husi ami nia hanoin, data di’ak liu ne’e 20 Marsu 2017 primeira volta ba eleisoen prezidensiais, 20 Abril segunda volta. Ita presiza mós konta, tanba iha fulan Abril Santa Paskua ne’ebé presiza respeita buat hirak ne’e,” informa José Luis.

Eis Ministru Negosius Estranjeirus ne’e realsa katak, eleisaun lejislativa ne’e iha loron 8 fulan Jullu 2017, maibé ne’e depende ba Prezidenti Repúblika no Governu. Maibé hanesan Prezidenti bankada propoin ba iha Xefi Estadu.

Entretantu reprezentante Partidu CNRT, Virgílio Smith mós informa katak,  enkontru ne’e, hanesan audénsia Prezidenti Repúblika nian, ho Partidu polítiku hotu, hodi husu opiniaun konaba loron eleisaun Prezidénsial ho Parlamentar.

Nia hatutan, Parpol hotu ba audénsia ho PR Taur Matan Ruak hodi ko’alia konaba proposta ne’ebé Governu hato’o ba Prezidenti Repúblika, li-liu relasiona ho eleisaun jeral 2017.

“Husi partidu CNRT, Prezidenti Repúblika husu partidu nia opiniaun, ami dehan katak, proposta ne’ebé mai husi Governu, partidu konkorda, maibé desizaun iha Prezidenti Repúblika nia liman,” tenik Virgilio Smith.

Nia hatutan katak, Governu nia proposta ba eleisaun Prezidensiál ne’e, sei monu iha 20 de Marsu, kuandu iha segunda volta, entaun sei monu iha 20 de Abril, purtantu eleisaun Parlamentar, sei monu iha 8 de Jullu 2017.

Virgilio dehan, desizaun ne’e iha Prezidenti Repúblika nia liman, maibé antes Xefi Estadu atu dekreta, tenki rona partidu polítika sira.cos

Jornal Nacional