“DEROTA” DALA-2 IHA ELEISAUN PR, LU-OLO KONTINUA AVANSA IHA 2017

Maske lakon dala rua iha kompetisaun eleisaun Prezidenti Republika (PR) iha tinan 2007 ho 2012, maibe la hamate espiritu no vontade bo’ot Prezidenti Partidu FRETILIN, Francisco Guterres “Lo-Olo”, atu kontinua avansa fali tan iha eleisaun prezidensial 2017.

Iha eleisaun prezidensial tinan 2007, Lu-Olo konsege hakat to’o segunda ronde no lakon ho kandidatu independenti Jose Ramos Horta. Nune’e, iha fali tinan 2012 mos Lu-Olo hetan tan derota hasoru nia rival iha segunda ronde Taur Matan Ruak.

Liu husi konferensia imprensa ne’ebé hala’o iha sede Comite Central FRETILIN (CCF), Comoro, Dili, Segunda (12/12/2016), apoiantes partidu FRETILIN nian husi munisipiu 12 deklara fo apoiu tomak ba Francisco Guterres “Lu-Olo” atu avansa kandidatura ba PR 2017 nian.

Apoia hanesan mos mai husi Organizasaun Pupular Mulher de Timor (OPMT), veteranus, Joventude FRETILIN, organizasaun filiada sira, grupu tekniku no ativista sira.

Lu-Olo deklara katak, hahú inisiu iha ona mensajen husi apoiantes no veteranus Timor oan lubun bo’ot sira ne’ebé laos militante FRETILIN atu fo apoiu avansa kandidata an ba PR iha eleisaun PR 2017.

“Hau simu mensajen husi camaradas, husi veteranus no Timor oan sira ne’ebé laos militante FRETILIN fo fiar nafatin katak hau iha kapasidade atu bele lidera nasaun ne’e nudar Presidente da Republika ba ema hotu hotu,” afirma Lu –Olo.

Liu husi reuniaun Comissão Politica Nacional (CPN) FRETILIN ne’ebé hala’o iha loron 8 Dezembru 2016, koresponde hikas vontade jeral ne’ebé espresa iha kongresu no konferensia nasional sira no delibera no fo apoiu ba Lu-Olo nudar kandidatu husi partidu FRETILIN nian ba kompete iha eleisaun Prezidenti Republika nian iha 2017.

“Hau hakarak aproveita oportunidade ida ne’e atu dala ida tan agradese ba apoiu tomak ne’ebé fo mai hau no ho onra bo’ot maka hau simu dezafiu ida ne’e tan, no hau iha serteza katak hamutuk ita sei manan,”afirma Lu – Olo.

PR Taur Matan Ruak mos ajenda ona atu iha tempu badak halo enkontru ho partidus politikus hotu-hotu atu koalia kona-ba loron eleisaun Prezidenti Republika nian ba period 2017-2022.

“Banhira Prezidenti Republika (PR), Taur Matan Ruak, fo sai ofisialmente kalendariu ba aprezentasaun kandidatura nian,hau sei halo anunsiu ofisial ba publiku tomak kona ba hau nia kandidatura, hau hakarak reafirma katak hau sente onra bo’ot tebes ba konfiansa ne’ebé hau simu husi kuadru no militante FRETILIN sira, Veteranu no sidadaun sira seluk  atu tulun hau hodi aprezenta haunia an nudar kandidatu ba Presidente Republika,”hateten Lu-Olo.

Kona-ba figura Lu-Olo nian ne’ebé ‘derota’ dala rua iha eleisaun PR 2007 ho 2012, Sekretariu Jeral FRETILIN, Mari Alkatiri, liatun dehan, Lu-Olo nunka lakon, maibe komputador maka halo lakon.

“Se ita akompaña konjuntura politika agora dadauk, ita bele dehan katak 2007 sei la repete fila fali no 2012 mos sei la repete fila fali, ne’e hau nia individual, hau nia konviksaun maka ne’e laiha segunda ronde tanba Presidente Lu– Olo sei manan iha primeira ronde deit,”Alkatiri hateten ho fiar an.

Kandidatu PR ba 2017 nian ne’ebé komesa deklara ona sira nia kandidatura maka hanesan, Francisco Maher Lopez “Fatuk Mutin” nudar kandidatu independenti maibe hetan apoiu mos husi Partidu Sosialista Timor (PST) no Asosiasaun Combantentes Brigada Negra (ACBN), ho mos Jose das Neves “Samalarua” nudar mos kandidatu independenti.Nes

Jornal Nacional