Grupu Bandidu Rama Ambon, Uza WhatsApp Monitoriza Movimentu Polisia

DILI - Polísia Nasionál Timor Leste (PNTL) identifika ona grupu rama ambon ne’e organizadu uza WhatsApp hodi monitoriza movimentu Polísia nian no rama ne’ebé sira uza produs iha Tibar.

Komandante PNTL munisípiu Dili, Superintendente Xefe Pedro Belo dehan, Polísia identifika rama ambon ne’e grupu ne’ebé organizadu sira uza meius barak hanesan WhatsApp no telefone hodi monitor movimentu polísia nian bainhira sira hana ema polísia ba sira fó hatene malu ona hodi halai lakon no identifika hodi prende ona rama barak sira produs iha Tibar.

“Ita hatene rama ambon ami kaer ema barak maka ba ona prizaun preventiva, mais kontinua mosu nafatin ita hatene sira ne’e grupu ida ne’ebé maka organizadu tebes, mais ita identifika ona sira uza meius WhatsApp hodi monitor movimentu ita nia polísia nian no ita mós prende ona rama barak ne’e sira produs iha Tibar,” dehan Pedro ba jornalista sira iha Kuartél Jerál PNTL Munisípiu Dili, Sesta (09/12).

Nia hatutan, bainhira polísia tránzitu hala’o pasa revista iha loron 8 dezembru ne’e konsege kaptura joven na’in rua ne’ebé uza motor lori pasta viola nian, maibé iha laran sira lori rama ambon tanba ne’e maka detein kedas sira na’in rua.

“Iha loron 8 ne’e tuku 3 madrugada ami halo antisipasaun iha merkadu Komoro laran, tanba antes ne’e mosu ona problema balun iha ne’ebá, servisu hamutuk ho komunidade ne’e detekta grupu ne’e atu hala’o tan sira nia asaun no kaptura kedas ema na’in rua tan kompletu ho evidénsia rama ambon ho fiska,” dehan Pedro.

Nia dehan, hosi ema na’in rua ne’e maka Polísia hetan informasaun katak sira ne’e grupu boot ida maka halao operasaun hana ema iha Dili laran, no rama ne’e produs iha Tibar, Liquiça nian, bainhira rama ne’e tiru hotu ona maka foin sira ba foti fali iha Tibar.

“Kalan ne’e kedas ami deskobre iha Liquiça kalan ne’e, ami ba kedas fatin ne’e ema ne’e hanoin nia maluk maka atu ba foti rama ambon para atu reforsa tan sira nia asaun, foin intrega rama ami kaer kedas rama ne’e la’ós oituan, maibé barak tebes,” dehan Pedro.

Nia dehan, evidénsia sira ne’e lori ona ba Ministériu Públiku (MP) sira nia meius maka uza motor xapa-matríkula laiha, no grupu WhatsApp ne’ebé sira nia grupu ne’e iha Timor laran akompaña sira mos iha invoice call.

Polísia deskobre hotu sira nia modus ne’e no operasaun susesu tebes no agora polísia kontinua nafatin.

Nia dehan, hosi ema sira ne’eb’e maka kaptura ne’e mai hosi grupu Ikatan Kera Sakti Timor Leste (IKS-TL) ho 77, maibé 77 ne’e la’ós organizasaun ne’ebé taka sira, sei loke hela, maibé sira maka halo hela de’it problema tanba ne’e sira halo rekomendasaun ba governu hodi bele taka mós 77. (way) 

Timor Post