Ha’u Sei Tau Aas Liu Interesse Komun

DILI - Xefe Suku Eleitu Lahane Oriental, Trindade do Amaral Pinto Baptista promete katak, sei tau aas liu interese komún duke interese privadu.

Nia hato’o lia hirak ne’e iha seremónia agradesimentu ba transferensia poder hosi xefe suku sesante iha Sentru Juvenil Taibessi, Suku Lahane Oriental, Postu Administrativu Nain Feto, Munisípiu Dili, Sábadu (10/12).

“Ohin ami hala’o misa agradesementu ba povu iha suku Lahane Oriental no aumesmu tempu xefe suku sesante Fernando da Cruz simbolikamente hala’o transferensia ona poder ba ha’u hodi lidera suku Lahane Oriental,”nia informa.

“Ha’u nia komitmentu hatete, ha’u la’ós mai ukun hanesan liurai ka baino suku ne’e no la’ós ha’u mai atu servi de’it ha’u nia família sira, maibé ha’u mai atu servi povu hotu iha suku ne’e hosi aldeia ida pur ida too aldeia 13,”nia esplika.

Iha seremónia agradesimentu ne’e, xefe suku eleitu entrega mós akta kandidatu sira hanesan xefe suku, xefe aldeia, delegadu no delegada, joventude ba Admistradór Postu Admistrativu Nain Feto, Alberto Braz hodi bele enkarega ona servisu ba xefe suku foun.

Tuir nia, iha lei suku nian iha númeru 9/ 2016 hatuur ona iha matadalan, xefe suku sesante sira nia mandatu remata iha loron 31 fulan Dezembru, maibé seremonia ohin, xefe suku sesante entrega antes atu iha loron 1 fulan Janeiru tinan 2017, bele hahú ona hala’o servisu.

“Servisu primeiru ne’ebé mak atu halo sei hadi’a uluk sistema admistrasaun suku nian hodi nune’e fó atendimentu ba povu ho di’ak no onestidade hodi hatuur lolos transparansia. La’ós atu hadi’a buat hotu, buat ne’ebé mak di’ak bele kontinua no buat ne’ebé ladi’ak bele hadi’a hodi benefisia povu,”nia subliña.

Aleinde hadi’a sistema administrasaun suku, nia dehan, sei halo resensiamentu komunitáriu hodi rejista kualidade saúde, kualidade edukasaun, ambiente iha suku lao oinsa, ema hira mak hetan empregu no hira mak laiha empregu inklui rezolve problema bee moos. (gus)

Timor Post