Rendimentu Husi Tais Mak Bainhira Ema Hameno Barak

DILI, (ANTIL) - Rendimentu Sentru Kooperativa Bobometo, grupu feto ne’ebé halai liubá produsaun Tais Timor-Leste liuliu tais motivu husi rai ketan Oekusi ne’e, hetan rendimentu barak bainhira ema hameno no diariamente rendimentu depende ba kompradór sira.

Rosalina da Costa, Koordenadór Sentru Kooperativa Bobometo ba ANTIL, iha Bebonuk, Segunda, (12/12/2016) relata, loron ida mak ema enkomeda selendang to’o 20 maka sira bele hetan to’o dolar 200 tanba kada selendang fa’an ba dolar 10.

Grupu feto husi Oekusi ne’e, hetan suporta barak husi Ministériu Komérsiu Indústria no Ambiente (MKIA) liuliu iha Diresaun Indústria tanba bele foti produtu husi grupu ne’e to’o 1000 to’o 2000 no husi Organizasaun Naun Governamentál (NGO) ki’ik sira, enkomenda tais ne’ebé barak liu.

Produtu tais ne’e, prodús husi grupu feto hamutuk ema na’in-15 ne’ebé hala’o atividade soru tasi loroloron. Husi na’in-15 ne’e, na’in lima mak sai ona membru permanente.

Atividade grupu ne’e hahú iha 2002. Ba membru sira ne’ebé hala’o atividade ne’e hetan insentivu husi sira-nia serbisu soru tais nian. Kada tais hanesan selendang ne’ebé prodús ona husi membru ida sei hetan insetivu dolar 3. “Tais feto pár ho nia selendang ne’e hetan dolar 13”, Rosalina dehan.

Grupu Bobometo husi oekusi ne’e, ema barak koñese ona maibé dalaruma difisil tanba fatin ne’ebé dook husi sentru nune’e halo ema barak ladún hatene fatin, nune’e halo Riosalina triste.“Maibé ami halo ba rai de’it ne’e ladún atu hetan osan no tenke buka ami-nia langgananpara sasán ne’ebé ami halo ona ne’e ami tenke fa’an ba”, nia dehan.

Atu ema bele hatene no koñese liután, grupu Bobometo ne’ebé enderesu iha Bebonuk ne’e, servisu hamutuk ho MKIA atu kria fatin ida ne’ebé iha sentru para ema bele fasil atu vizita.“Agora ne’e iha loos laran, ema ladún koñese maibé iha ona hanoin husi Governu sira atu kria fatin mai ami maibé sei planu hela”, nia hatutan.

Kona-ba prodús tais orijinál Timor-Leste nian, Rosalina hatete, motivu ne’ebé halo mai husi ideia ne’ebé iha nomós liuhusi formasaun ne’ebé MKIA oferese ba sira.  “Formasaun husi PT.Artcha Indonézia ne’ebé koopera ho MKIA, kria programa ida ne’e. Durante ne’e ita-nia motivu mak amostra oioin maibé ita halo amostra ida de’it, entaun ami kontente tanba Governu servisu hamutuk ho Artcha no fó formasaun mai ami, husi amostra ida de’it maibé ami bele kria ba oin rua no tolu husi motivu ne’ebé ami seidauk iha”.

Enkuatu motivu ne’ebé sira aprende no halo sempre kahur ho Timor-Leste nian tanba ida ne’e identidade nasaun nian tanba bainhira foti motivu seluk entaun motivu Timor-Leste lakon no identidade mós no uza ema nian motivu fali. (Jornalista : Maria Auxiliadora/Editor: Otelio Ote)

Foto: Rosalina da Costa, Koordenadór Sentru Kooperativa Bobometo.