MORAS HIV MOSU TANBA SEKSU LIVRE

Sekretariu Ezekutivu Komisaun Nasional Kombate HIV-SIDA, Daniel Marcal hateten, moras HIV-SIDA mosu, tanba feto no mane barak hala’o relasaun seksual livre signifika halo relasaun seksual ho ema seluk.

“Moras HIV-SIDA mosu, tanba ita nia hahalok rasik ne’ebe mai husi halo seksual livre, tanba maioria feto ho mane sira halo relasaun seksual arbiru deit ne’ebe laos nia fen ou laen e wainhira kona ona moras refere maka ita atu fo sala ba se ho nune’e atu redus moras HIV-SIDA iha Timor  presija servisu hamutuk entre entidades hotu hanesan Governu, Igreja no komunidade tomak,”hateten Daniel Marcal, ba JN-Diario foin lalais ne’e.

Nia dehan, seksu livre akontese iha fatin prostitusi no dalabarak akontese ba joven feto no mane ne’ebe foin tuir malu.

“Seksu livre akontese iha fatin prostitusi no dalabarak akontese ba joven feto no mane ne’ebe maka foin tuir malu ou namora hodi implementa domin ho seksu ho nune’e husu ba joven sira wainhira tama iha prosesu namora presija lori idak-idak nia an hodi hadomi malu tuir maromak nia ukun fuan katak relasaun seksual so akontese deit entre fen ho laen, tanba wainhira halo relasaun seksual ho ansi no nauk maka ita mos sei nauk moras HIV-SIDA husi hahalok refere,”dehan Daniel.

Nia hatutan, tuir informasaun katak estudante Timor oan ne’ebe ba eskola iha Indonesia balun fila mai Timor ho moras HIV-SIDA.

“Tuir informasaun ne’ebe ami hetan katak estudante Timor oan ne’ebe ba eskola iha Indonesia balun fila mai Timor ho moras HIV-SIDA no isin rua, maibe ami seidauk iha dadus kompletu ho nune’e sosialijasaun hala’o nafatin hodi fo hanoin ba joven sira atu labele halo relasaun seksual ho ema arbiru,”hateten Daniel.

Alende ne’e husu ba parte Igreja atu eduka no fo hanoin nafatin ba sarani katolika hotu konaba maromak nia ukunfuan ho nune’e hahalok ema idak-idak bele tuir regulamentu no ukun fuan maromak.

“Husu ba parte Igreja tenki eduka no fo konselin ba sarani katolika hotu liu-liu ba joven atu bele iha konsiensia hodi hatene hamtauk maromak, tanba prezensa maromak iha fatin hotu-hotu hanesan tasi ibun no kristu rei kotuk hodi akompaña hahalok at ne’ebe dalabarak akontese iha tasi ibun no kristu rei kotuk ne’ebe uja fali ema seluk nia sasan no isin lolon hodi senti gostu iha minutu balun nia laran maske ema ne’e lao’s ita nia fen ou laen,”tenik Daniel. Ita

Jornal Nacional