Eis-vise-ministra kondenada hatete katak kumpre deit orden Xanana Gusmão nian

Eis-vise-ministra Saúde, Madalena Hanjam, ne’ebé kondena iha ohin ba kadeia tinan haat  tanba  partisipasaun ekonómika iha negósiu, hatete katak  sei rekorre no  sempre atua tuir  instrusaun hosi  eis-primeiru-ministru Xanana Gusmão.

"Ha’u lasatisfeitu. Sei rekorre. Laiha buat ida maka ha’u nia  responsabilidade", informa Hanjam, iha  deklarasaun ba Lusa hafoin lé sentensa ba  prosesu ne’ebé komete ho eis-ministra Finansa Emília Pires, kondenadu ba prizaun tinan hitu  ho krime hanesan.

"Laós  justisa no ha’u sei  avansa ho rekursu. Karik ha’u  absolve hosi krime administrasaun danoza, ne’e ha’u nia  únika responsabilidade. Maibé laós partisipasaun ekonómika. Oinsa bele kondena ha’u tanba ne’e sé ha’u laós na’in ba kompañia nein hetan  benefísiu ekonómiku ruma? Kompañia ne’e laen kaben hosi Emília", nia afirma.

Emília Pires, eis-ministra Finansa, no Madalena Hanjam, eis-vise-ministra Saúde, hetan kondena tanba komete  irregularidade iha sosa kama óspital nian atus resin ho kontratu rua (A no B) adjudikadu ba empreza Emilia nia kaben nian, ho konlui entre sira na’in tolu ba konkretizasaun negósiu ne’e, ho valár dólar rihun  800.

"Primeiru-ministru tenki responsabiliza, nia maka aprova osan, ba ezekusaun, ajuste diretu, ba ida ne’ebé aprova buat hirak ne’e hotu maka  primeiru-ministru", hatete ba Lusa, iha Tribunál Díli, refere xefe Governu  iha tempu ne’ebá, Xanana Gusmão.

"Ha’u só  kumpre orden tanba kama hirak ne’e di’ak ba povu, atu  benefisia povu, laós ha’u.Osan ne’e laós mai ha’u, ba kompañia ne’ebé sira rekomenda no ninia uzu ne’e di’ak tuir  rekomendasaun hosi tékniku sira. Kulpa saida hosi ha’u ba ida ne’e?", nia kestiona.

Sentensa hosi prosesu ne’e, mediátiku liu iha istória sistema judisiál timoroan, fó sai ohin iha Tribunál Díli hosi prezidente koletivu juíz, José Maria Araújo, no sein prezensa Emília Pires, ne’ebé tuir  defeza, simiu tratamentu médiku iha Portugál.

Tribunál absolve argida na’in rua hosi krime administrasaun danoza no rejeita argumentu hosi Ministériu Públiku katak kauza danus ekonómiku ba Estadu.

Madalena Hanjam hatete  katak nia responsabilidade limita deit iha prosessu administrativu no kona-ba aspetu ne’e, tribunál absolve, no afirma katak  lahetan  benefísiu ekonómiku no kumpre deit  orden hosi  xefe Governu.

"Laiha osan ida mai ha’u. Osan hirak ne’e ba ninia konta  no sira maka tansfere, laiha buat ida mai ha’u", nia afirma.

"No sé maka aprova buat hirak ne’e hotu maka primeiru-ministru Xanana Gusmão. Sé maka  rekomenda maka ministru ne’ebé  vizita fábrika ne’e, ha’u  ezekuta deit, kumpre orden. Sé maka jere movimentu osan hirak ne’e maka Emília. Ha’u assina deit kontratu hafoin hetan  instrusaun hosi  primeiru-ministru. Ne’e lajustu", nia afirma.

SAPO TL ho Lusa - Fotomontaje Timor Agora