Kapital Dili, Prezepiu Hari De’it iha Fatin Tolu

DILI - Polísia Nasionál Timor-Leste (PNTL) hosi Munisípiu Dili, oras ne’e dadauk halo operasaun (kontrolu) tama sai bairru sira iha Kapitál Dili, hodi kontinua husu ba sarani sira atu labele harii prezépiu iha dalan públiku nomós bairru laran.

Iha loron Sesta (16/12), mais menus tuku 15.30 otl, Polísia Munisípiu Dili ne’ebé maka uza kareta patrullamentu nian hamutuk unidade rua (2), tama iha Bairru Sentru E, Aldeia 04 Setembru, Suku Komoro, hodi husu ba joven sira ne’ebé harii hela prezépiu atu hapara atividade refere.

Atuasaun ne’ebé maka parte Polísia halo iha Bairru Sentru E, liliu husu atu hapara atividade harii prezépiu, tanba iha momentu halo operasaun ne’e, Polísia hetan joven sira harii prezépiu iha dalan (Estrada Bairru nian).

Tuir observasaun Timor Post nian iha terenu katak, hosi parte Polísia hatudu no esplika hela ba joven sira kona-ba despaisu ne’ebé maka iha.

Iha esplikasaun ne’e, parte Polísia dehan, hosi autorizasaun ne’ebé maka hasai ona hosi Igreja, katak, fatin ne’ebé maka bele utiliza ba harii prezépiu maka hanesan iha Kapela, Gruta no Igreja.

Tanba, hosi prezépiu ne’ebé maka joven sira harii iha Bairru Sentru E, alende iha estrada, prezépiu refere mós dook hosi Kapela (Uma Laku Bairru Sentru E) nian.

Hafoin rona tiha esplikasaun hosi parte Polísia nian, joven hirak ne’ebé harii hela prezépiu iha Bairru Sentru E, promete hodi dehan, sira prontu atu kumpri desizaun ne’ebé maka iha.

Hafoin husu joven sira iha Bairru Sentru E hodi labele kontinua harii prezépiu iha dalan públiku, Polísia kontinua halo operasaun iha area Komoro nian, ho objetivu ne’ebé maka hanesan.

Antes ne’e, Dioseze Dili, hasai ona despaisu ba iha parókia hotu iha territóriu laran tomak atu iha tinan ida ne’e bandu sarani halo prezépiu iha dalan públiku inklui bairru.

Padre Parókia Motael David da Conceiçaõ Alves, hatete, agora dadaun tama ba iha festa Segundu Adventu nian, tan ne’e fó hanoin ba públiku katak, primeiru Domingu to’o iha loron 16, seidauk bele halo prezépiu no la toka múzika natál no iha loron 17, foin bele halo prezépiu no toka múzika natál.

“Tanba ne’e orden ne’ebé parókia sira ba simu iha Dioseze katak, ba tinan ida ne’e Igreja bandu labele halo prezépiu iha dalan públiku no iha bairru-bairru,”haktuir Pe. David, hafoin remata Misa Solene iha Kapela Santu Arcanjo Surikmas, Kinta (08/12).

Pe. David, hatutan, durante ne’e joven sira ho inisiativa hodi halo prezépiu iha kada bairru, maibé ho intensaun la lós.

Tanba Pe. David dehan, prezépiu la’ós fatin atu tau kuluna bo’ot hodi toka de’it múzika hodi impede sarani sira natál labele ba misa, tu’ur iha prezépiu hodi hemu lanu, dansa no hader kalan tomak, dalaruma prezépiu mosu fali buat sira ne’ebé la’ós manifesta Kristu mai atu lori dame, maibé botir sira maka rahun arbiru iha estrada klaran.

“Ne’ebé desizaun maka ne’e, prezépiu halo de’it iha Kapela, Gruta, no iha Igreja. Prezépiu ne’ebé halo iha Kapela, Gruta no Igreja tenke halo tama ba iha laran atu labele impede tráfiku, tanba ne’e keta haluha halo prezépiu ne’e di’ak hatudu katak, sarani sira hanoin Kristu sai ema mai iha mundu hodi ema ida-idak ba iha salvasaun,”esplika Pe.David. (tay)

Timor Post