Gasto Hateten Sei Troka Ro Nakroma

DILI - Ministru Obras Públika (MOP), Gastão Sousa hatete, oras ne’e governu planeia hela atu haree ró seluk hodi troka ró Nakroma, tanba ne’e husu ba ema hotu atu kontinua pasiensia uituan no komprende ho kondisaun ró nakroma nian tanba ró ne’e kleur ona.

“Sé ita haree kondisaun balun ladun di’ak ita hotu tenki kompriende kondisaun ró Nakroma nian tanba ró ne’e tinan 10 ona, ami sei haree hodi bele troka ho ró seluk,”dehan Gastão ba Jornalista iha Hotel Timor, Kinta, (15/12).

Nia hatutan, nia vise mós koa’lia bei-beik ona kona-ba kondisaun ró ne’e nian no prosesu halo manutensaun mós la’o ona ho di’ak, tanba ne’e nia lakohi kometa liu kona ba prosesu manutensaun nian.

“Maibé nia manutensaun la’o di’ak espera nia bele fasilita ita nia pasajeirus hosi Oe-Cusse mai iha ne’e no Atauró nian,” dehan Gastão.

Antes ne’e, Vise  Ministru Obras Públikas Transportes no Komunikasaun (MOPTK), Inácio  Moreira hatete, problema fasilidade iha ró nakroma hanesan Toilet, AC no Haris Fatin ne’ebé laiha kondisaun di’ak, ida ne’e la’ós  problema bo’ot maibé importante liu maka ró ne’e bele halo operasaun.

Inácio  hatete, lolo’os públiku tau liu kestaun ba ró ne’e atu kada loron tenke halo operasaun tula pasajeiru sira, la’ós  preokupa fali problema kikuan sira hanesan ne’e, tanba kada loron tékniku sira sempre halo cross check ba fasilidade sira ne’ebé a’at.

Inácio  rekoñese katak problema sira ne’e sempre mosu duni maibé la’ós  lor-loron maibé dalaruma de’it. Problema ne’e sempre akontese tanba pasajeirus barak maka laiha konsiénsia atu utiliza fasilidade ne’ebé iha.

“Ha’u agradese tanba bele hetan infórmasaun sira hanesan ne’e, maibé ha’u husu infórmasaun hotu ne’ebé fó sai mós tenke ho lolo’os, maibé kestaun sira hanesan ne’e di’ak hela tanba sempre iha manutensaun rútina, tanba ne’e ha’u  preokupa liu mak lahalo operasaun,” dehan Inácio  Moreira iha Sede Partidu FRETILIN, Komoro-Dili, Segunda, (12/12).

Inácio  hatete, informasaun ne’ebé fo sai hosi mídia sira ida ne’e di’ak nune’e ninia parte bele toma bebeik atensaun hodi kontinua halo manutensaun rútina ba fasilidade sira ne’ebé a’at.

Ró Nakroma semana ida ne’e nia laran sei ba halo manutensaun rútina annual nian, para atu antisipa tinan oin tenke iha kondisaun ró nian ne’ebé di’ak atu hodi atende kampañia rua ne’ebé sei halo iha tinan oin mai.

Sikun seluk, Organizasaun Naun Govermental (ONG), Luta Hamutuk husu ba governu liu-liu Ministériu Transporte no Komunikasaun (MOPTK) tenke aumenta ró ida hodi substitui ró Nakroma ne’ebé oras ne’e kondisaun hahú  a’at.

“Ami fo rekomendasaun ba governu, se di’ak liu ró pasajeirus di’ak liu aumenta tan rua hodi bele substitui ró Nakroma bainhira  a’at,” hatete Diretór Ezekutivu Luta Hamutuk Mericio Akara ba jornalista iha nia servisu fatin Farol, Segunda, (12/12).

Tuir Akara, governu tenke hahú  foti desizaun emidiata ba ró nakroma, tanba kondisaun ró kleur ona, fasilidade barak maka a’at ona, tanba se husik hela de’it hanesan ne’e bele fo risku ba pasajeiru sira.

“Atu antisipa dezastre ba ró Nakroma tenke prepara ona ró foun, atu aluga ka atu sosa, ne’e depende ba governu hodi nune’e ba oin labele hamosu dezastre,”sujere Akara.

Bainhira governu la antisipa maka ikus mai akontese buat ruma, publiku tomak sei fo sala ba governu tanba ró nia kondisaun ladun di’ak maibé kontinua halo operasaun nafatin.

Kona-ba fasilidade sira hanesan hariis fatin no buat seluk tan ne’ebé maka a’at,  governu tenke haree ona atu oinsa ró ne’e labele halo lai operasaun hodi nune’e bele tama ba manutensaun.

“Ami nia hanoin hatoo ba governu se di’ak liu haree ba kondisaun ró Nakroma mak la di’ak, se bele hapara operasaun atu labele fo risku ba pasajeirus Oe-Cusse no Atauro,” hatete Akara.

Akara mós husu ba governu no parte relevante sira iha ró Nakroma tenke kria regulamentu interna ida hodi bele define lolo’os tarifa ba pasajeirus sira.

Labele iha pasajeirus balu sa’e selu iha balu sa’e ho gratuita, ne’e tantu ba ema bai-bain no polísia  sira, agora se polísia  maritime sira sa’e la selu, ne’e lolo’os labele.

Se regras internal aplika dehan tenke selu, entaun se de’it mak sa’e ró ne’e tenke selu tantu polísia  ka se de’it tenke selu.

Entretantu foin lalais Sabadu (11/12) pasajeirus Ataúro tenke taka metin sira nia inus, tanba toilet iha ró Nakroma intupidu. (way)

Timor Post