Emprezáriu
timoroan Abílio Araújo hatudu ona satisfeitu iha loron-sábadu tanba proposta
hodi sosa partisipasaun Oi iha Timor Telecom, ne'ebé halo hosi grupu Investel,
ne'ebé lidera, aseita hosi operadora brazileiru.
Bainhira
kontakta liuhosi telefone iha estranjeiru - halo hela viajen serbisu nian -
Abílio Araújo hatete katak simu "karta formal ida hosi Oi" maibé nia
konfirma ona katak seidauk hatene kalendáriu hodi konkretiza operasaun ne'ebé
sei pendente hela iha faze dahuluk hosi autorizasaun judisial.
"Ami
nia proposta aseita tiha ona no ami senti satisfeitu no ami hein de'it resposta
hosi juís atu bele avansa ho prosesu tomak", nia hatete no felisita katak
solusaun implika atu operadora sei kontrola hosi timoroan sira.
"Hahú
hosi prinsípiu ha'u defende nafatin opiniaun ne'e maibé desizaun la'ós depende
de'it hosi timoroan sira nia hakarak, depende hosi na'in, hosi vendedor",
nia fó hanoin.
Abílio
Araújo hatete katak hafoin asumi tiha diresaun Timor Telecom, hakat dahuluk
maka reuniaun ida "ho Governu timoroan hodi aprezenta planu sira ba prazu
badak, médiu no naruk" no hafoin ne'e reuniaun ida ho Autoridade Nasional
Komunikasaun sira nian".
Kestaun
ida ne'ebé sei ko'alia iha reuniaun ho ezekutivu maka tusan hosi Estadu ba
Timor Telecom, ne'ebé tuir empreza agora daudaun aumenta ba dolar millaun sia
resin.
"Governu
mós hanesan asionista, tenki asumi mós nia parte. Situasaun ne'e labele kontinua
hanesan ne'e. Ha'u iha ona reuniaun oioin ho responsável governamental oioin no
agora ha'u fiar katak ami sei hetan entendimentu ida, ami sei hetan dalan sira
koperasaun nian hodi nune'e bele rezolve kestaun ne'e lalais", nia hatete.
"Ami
sei halo mós vizita badak ba operador rua seluk merkadu nian, Telkomcel
(indonézia) ho Telemor (vietnamita) hodi ami aprezenta hanesan parseiru ida
ne'ebé sei hakarak duni koperasaun ida entre ema hotu iha baze lei nian, hodi
hakarak halo merkadu konsumidor sira nian satisfeitu", hatete.
Responsável
hosi grupu Investel hatete ona katak iha ona "planu investimentu ida hodi
hametin kapasidade Timor Telecom nian iha prazu badak no médiu" hodi bele
hametin pontu sira ligasaun nian hodi "garanti kobertura lokal total"
hosi teritóriu timoroan nian.
"Ami
hatene kona-ba situasaun internet nian, hosi banda larga. Hanesan situasaun
sira ne'ebé ami hakarak investe. Investimentu ne'e no sira seluk hanesan ami
nia planu sira", nia hatete.
"Maibé
agora daudaun ami nia preokupasaun maka kontrola kustu sira no rasionaliza
serbisu tomak hodi nune'e ami bele prepara ba hakat tuirmai", nia esplika.
Oi
fó sai iha semana liubá katak husu ona autorizasaun judisial hodi fa'an nia
partisipasaun iha Timor Telecom ba grupu Investel Communications Limited,
ne'ebé xefia hosi Abílio Araújo no iha investidór sira hosi Xina no Médiu
Oriente, ho dolar millaun 63.
"Oi,
hafoin prosesu kompetitivu fa'an nian, simu ona proposta hosi Investel
Communications Limited hodi hetan partisipasaun diretu no indiretu sira iha
Timor Telecom ho folin besik dolar millaun 36, aleinde selu tusan sira hosi
Timor Telecom ho empreza sira hosi grupu Oi ho folin dolar millaun 26",
esplika hosi nota Oi nian.
To'o
prazu limiti ne'ebé empreza fó, 08 Outubru, Oi simu ona oferta tolu "firmi
no vinkulativu" hodi sosa nia partisipasuan iha Timor Telecom.
Oferta
rua entre oferta tolu halo hosi grupu ne'ebé lidera hosi emprezáriu timoroan
sira no ida seluk hosi fundu ida pensaun sira hosi Fiji.
Timoroan
na'in rua ne'ebé iha interese iha negósiu maka Abílio Araújo, responsável hosi
grupu Investel Communications Limited - ne'ebé iha sósiu sira no kapital hosi
Médiu Oriente no Xina - ho Nilton Gusmão, hosi grupu ETO.
Bainhira
hatán kona-ba karik iha kolaborasaun ruma iha futuru ho grupu ETO, Abílio
Araújo hatete katak iha fatin ba envolvimentu hosi Nilton Gusmão nia empreza
iha produtu oioin hosi operadora timoroan nian.
"Prosesu
hotu ona, ami manán no ami prontu atu haree ho nia planu sira. Iha produtu
oioin ne'ebé Timor Telecom bele aprezenta no iha produtu oioin relasionadu ho
sira ne'ebé bele iha liu interese", nia hatete.
"Ami
bele hetan dalan sira hodi valoriza no lori partisipasaun boot ida hosi
timoroan sira iha projetu ne'e", nia hatete.
Iha
kauza maka parte boot hosi kapital TT nian (54,01%), kontrola hosi sosiedade
Telecomunicações Públicas de Timor (TPT), ne'ebé iha fatin seluk Oi kontrola
76% hosi kapital, ne'ebé tau hamutuk partisipasaun diretu ida hosi PT
Participações SGPS ho 3,05%.
Asionista
sira seluk TPT nian maka Fundasaun Harii - Sosiedade ba Dezenvolvimentu
Timor-Leste nian (ligasaun ho dioseze Baucau) ne'ebé kontrola 18% no Fundasaun
Oriente ho 6%.
Iha
TT, kapital sira fahe entre TPT (54,01%), Estadu timoroan (20,59%), empreza ho
sede iha Makau VDT Operator Holdings (17,86%) ho emprezáriu timoroan Júlio
Alfaro (4,49%).
SAPO
TL ho Lusa
Sem comentários:
Enviar um comentário