terça-feira, 3 de janeiro de 2017

António Guterres apela atu dame sai hanesan prioridade ida

PARTILHAR
Sekretáriu-jeral foun ONU nian, António Guterres, asinala nia loron mandatu horisehik hodi apela atu dame sai hanesan prioridade ida.

"Mai ita halo 2017 hanesan tinan ida dame nian", hatete hosi antigu primeiru-ministru portugés no eis-Komisáriu Aas ONU nian ba Refujiadu sira, iha nia mensajen dahuluk nu'udar sekretáriu-jeral ONU nian, ho títulu "Apelu ba Dame".

Nia realsa katak kompromisu ho dame hahú hosi "loron ohin no loron-loron" no tenki hanesan "prinsípiu orientador" ida, Guterres konfesa katak hanesan "liuliu, pergunta ida" ne'ebé "asalta konsiénsia" no hatete katak sei interoga oinsá "tulun ema millaun resin ne'ebé sai hanesan vítima hosi konflitu sira no ne'ebé terus maka'as iha funu sira ne'ebé hanesan laiha rohan?".

Observa katak iha funu "laiha ema ida manán; ema hotu lakon", Guterres kritika ona osan "dolar biliaun resin ne'ebé gasta hodi estraga sosiedade no ekonomia sira, hodi alimenta siklu sira deskonfiansa nian no tauk ne'ebé bele mosu kleur iha jerasaun sira".

Líder hosi organizasaun boot iha mundu iha tinan lima oinmai fó hanoin ameasa hosi terorizmu global no oinsá "rejiaun importante sira iha planeta hasoru dezestabilizasaun maka'as".

Ba sekretáriu-jeral foun ONU nian, ultrapasa "diverjénsia polítika sira" eziji solidariedade, kompaixaun, diálogu no respeitu.

"Mai ita halo 2017 hanesan tinan ida ne'ebé ema tomak - sidadaun sira, governu sira, dirijente sira - bele ultrapasa sira nia diferensa sira", apela hosi António Guterres.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: