Resenseamentu Eleitorál ba Sidadaun Timoroan iha Austrália no Portugál Extende to’o 17.01.2017

DILI (ANTIL) - Governu deside atu extende prazu resenseamentu eleitorál ba timoroan sira iha Austrália no Portugál to’o loron 17 Janeiru 2017.

Primeiru-Ministru (PM), Rui Maria de Araújo,  Tersa (03/01/2017) iha Palásiu Governu wainhira halao enkontru informal ho media sira hatete, eleisaun prezidensiál no parlamentár iha tinan 2017, sidadaun timoroan sira iha estranjeiru, partikularmente iha Austrália no Portugál mós sei partisipa hotu.

Prazu neb’e determina tiha ona atu halao resenseamentu eleitoral mak loron 30 Dezembru 2016 maibé, haree ba interese boot timoroan sira ne’ebé iha Austrália no Portugál atu tau sira-nia naran hodi bele hetan kartaun eleitorál atu bele mós bele ezerse sira-nia direitu polítiku iha 2017, entaun governu desidi adia fali prazu ba loron 17 fulan Janeiro.

“Tantu semana rua ba tolu tan para sira bele bá rejista sira-nia an, hodi nune’e wainhira eleisaun jerál 2017, sira mós bele partisipa”, PM dehan.

PM relata, interesante mak foin daudaun, wainhira hahú prosesu, delegasaun Governu nian hamutuk ho STAE no CNE bá iha fatin sira ne’e, enkuantu iha rai-laran, iha debate boot ida kona-ba dupla nasionalidade ne’e. “Iha Austrália no Portugál, ita-nia sidadaun timoroan sira hatete dehan imi foin mak hadeer, agora mak imi mai buka ami. Uluk kuandu referendum ne’e imi mai buka ami bá vota hotu, agora kuandu nasaun independente tiha ona, agora mak imi mai husu para ami vota fali”.

PM hatete, sira mós sente parte husi komunidade nasaun ida ne’e nian. “Ita-nia sentimentu hanesan dupla nasionalidade, buka diskrimina ne’e, sei la ajuda ita atu reforsa prosesu konstrusaun nasaun no Estadu ne’ebé oras ne’e daudaun ita hala’o”.

“Iha tinan 1999 ita apela ba timoroan hotu iha ne’ebé de’it atu partisipa iha referendu hodi nune’e liberta ita-nia Pátria, ne’duni wainhira nia hakarak atu partisipa iha festa demokrasia ida ne’e, direitu konstitusionál ita tenki garante. Ha’u hein katak, ita-nia komunidade iha diaspora bele haforsa no hametin liután dinámika demokrátika hodi bele garante di’ak liután prosesu konstrusaun estadu ba oin”, PM katak.

Resenseamentu eleitorál no atualizasaun baze dadus iha Portugál no Austrália ne’ebé hala’o ona hamutuk 527. Iha sidade Lisboa, Portugál totál eleitór hamutuk 202. Sidade Darwin, Austrália, totál eleitór 82, Sydney  ho totál 243. (Jornalista: Maria Auxiliadora / Editor: Alberto Alves)

Foto: Primeiru-Ministru (PM), Rui Maria de Araújo. Foto, ANTIL / António Gonçalves, Tersa, 03/01/2

Lee mós ANTIL