PM : Dupla Nasionalidade Labele Asume Kargu iha TL, Ne’e Sala

DILI (ANTIL)– Primeiru-Ministru (PM), Rui Maria de Araújo iha reflesaun hamutuk ho mídia sira iha Palásiu Governu, Tersa (03/01/2017) hatete, relasiona ho kazu eis Ministra Finansa, Emilia Pires nian kona-ba diskusaun boot dupla nasionalidade labele asume kargu iha Timor-Leste (TL) ne’e la objetividade ona.

 “Ha’u-nia hanoin diskusaun ida ne’e laobjetividade ona, ezemplu  balun hatete katak ema ne’ebé dupla nasionalidade labele asume kargu iha Timor-Leste, ne’e sala”, PM dehan.

PM subliña ho faktu ema ida ho dupla nasionalidade, nia uza nia segunda nasionalidade atubele defende nia-an, lasignifika katak ema hotu-hotu ho dupla nasionalidade sei halo ida ne’e.

“Wainhira ita atu vota iha referendum, ita rekoñese ema ne’ebé ho dupla nasionalidade. Wainhira ita-nia Estadu independente ona, ita lakohi ema dupla nasionalidade atu mós partisipa iha prosesu dezenvolvimentu, ne’e lajustu”, PM katak.

Estadu, direitu demokrátiku labele hanesan ne’e. “Sala ne’e la’ós iha dupla nasionalidade. Sé ema ruma pratika korrupsaun, Tribunál mak tenke deside sé ne’e loos ka sala. Ne’e la’ós tanba nia dupla nasionalidade mak nia halo korrupsaun. Agora ita-boot sira haree de’it, ema sira nasionalidade ida de’it hira mak akuzadu ona? Hira mak KAK lori ona? Ema sira dehan nasionalidade timorense loos de’it ne’e hira mak bá KAK no laakuzadu iha Tribunál? Loos duni, sira ne’e labele halai”, PM haktenik.

“Ha’u-nia hanoin diskusaun ida ne’e presiza objetivu, ita tau sasán ho loloos. Laós tanba dupla nasionalidade mak mosu korrupsaun, la’ós tanba dupla nasionalidade mak ema bele hasees-an husi justisa maibé ida ne’e kestaun diversifiku ema hotu nian atubele partisipa iha dezenvolvimentu ida ne’e”, PM hatete.

Nune’e, PM husu wainhira mídia halo análize kona-ba kestaun ruma karik presiza ho objetividade. Konstituisaun rasik rekoñese dupla nasionalidade, pur tantu wainhira hatete ema ho dupla nasionalidade labele ezerse kargu ruma iha Timor-Leste signifika kontra fali konstituisaun.

PM mós salienta, asuntu importante ne’ebé relasiona katak públiku halo julgamentu ona antes tribunál foti desizaun. “Ida ne’e ba mídia, ba públiku sira tomak, ha’u-nia hanoin ita presiza korrije ita-nia an iha buat ida ne’e. Ohin akontese ba señora eis Ministra Emilia ho señora Madalena, aban bele akontese ba ita sira ne’e ida”, PM haktenik. (Jornalista: Maria Auxiliadora)