Konfrontu Bebonuk, Deskonfia Oknum PNTL Tiru Mate Joven Ida

Dili, (TATOLI) – Deskonfia Oknum Polisia Nasionál Timor-Lorosa’e (PNTL) tiru mate joven ida wainhira halo atuasaun iha konfrontu ne’ebé akontese iha Bebonuk, Dili.

Prima hosi matebian, Sandra Alves Coelho ba jornalista sira iha Sala Mortuáriu, Óspital Nasionál Guidu Valadares (ONGV) iha Sabadu (6/5), tuku 23:00.

“Akontesimentu ne’e situada iha uma oin Bebonuk wainhira PNTL halo atuasaun ba konfrontu entre joven sira iha ne’eba, maibé iha rezultadu asegurasaun ne’e deskonfia oknum membru seguransa tiru joven ida mate fatin wainhira nia fila hosi servisu atu ba uma,” informa prima hosi matebian, Sandra Alves Coelho ho tristeza.

Nia esplika, kronolojia hosi akontesimentu ne’e, vítima ho naran Tiago Inacio Coelho wainhira fila hosi servisu iha tuku 17:00 lorokraik atu ba uma maibé molok atu to’o nia hasoru kedan konfrontasaun entre joven sira iha fatin ne’eba, entaun kuandu seguransa sira halo atuasaun hodi halo asaun tiru dala neen, enkuantu nia mak sai vítima.

Kuandu família husu ba seguransa sira kona-ba tiru sinál dala neen iha fatin akontesimentu hodi rezulta joven ne’e mate tanba kuak iha nia fuan, maibe parte PNTL sira rezeita dehan la tiru nia.

“Ami husu ba Komanda PNTL atu halo investigasaun ba kazu ne’e tanba hatudu hahalok kriminozu hasoru joven sira,” nia dehan.

Vítima ne’e, dadaun iha Mortuariu Óspital Nasionál Guidu Valadares (ONGV) hodi hein prosesu autopsia hosi Polisia Foreinsik.

Matebian ne’e, ho naran Tiago Inacio Coelho hosi Munisípiu Ermera ho idade 17 ne’ebé servisu iha Dili.

Jornalista: Zezito Silva | Editor: Gantry Meilana