Povu Moris Diak, Tenke Garante Boa Governasaun

DILI – Atu atinji konseitu libertasaun povu, hodi povu ba moris diak, ukun nain sira neebe kaer poder tenke garante boa Governasaun ho Governasaun ida transparansia no moos.

Tuir Observador Politika-UNTL, Victor Soares katak, partidu politiku hamutuk 21 neebe partisipa iha atividade kampania eleisaun parlamentar nee, laiha partidu ida mak koalia korupsaun atinji boa Governasaun, hadia povu nia moris diak.

Hadia povu nia moris ita tenke haree boa Governasaun, Governasaun diak mak foin mak bele lori povu nee ba moris diak,” dehan Victor ba STL iha nia knar fatin Kampus Lama-UNTL, Caicoli-Dili, Segunda (03/07/2017).

Victor salenta, kuandu Governasaun ladiak, mal administrasaun, utilizasaun orsamentu sala, latuir planu, ida nee labele lori povu sai husi kiak no mukit nia laran.

Iha fatin ketak, Deputadu Bankada PD, Paulino Monteiro dehan, boa governasaun lao iha Timor Leste nee laos diak liu maibe buat barak mak sei problema. Paulino lamenta, dalaruma sistema lao, ita ema mak dalaruma mos lao ses husi sistema nee. Atu hadia ida nee presiza tempu naruk. Tanba nee Problema boa Governasaun ida mak rekursu umanus.

Entertantu, Observador Politika-UNDIL, Francisco Mausoro dehan, ita koalia konaba boa Governasaun nee ita koalia konaba rezultadu nee iha ka lae. Maibe durante nee ita haree katak durante nee progarama neebe mak Governu implementa barak mak sei faila. Raimundo S. Fraga

Suara Timor Lorosae