Banku australianu ANZ anunsia final ba atividade eskala ki'ik iha Timor-Leste iha Setembru

Banku australianu ANZ anunsia, iha loron-segunda ne'e, katak sei taka, hahú fulan-Setembru, nia atividade ki'ik sira no konsentra de'it iha área komersial, hodi konsidera katak ne'e hanesan di'ak liu hodi apoia kliente prinsipal sira hosi instituisaun ne'e. 

Iha komunikadu ne'ebé fó sai iha loron-segunda ne'e banku esplika katak produtu tomak ho serbisu sira ho eskala ki'ik sei taka iha loron 28 Setembru tinan ne'e no instituisaun "sei orienta fali nia negósiu sira iha Timor-Leste ba banka komersial".

"Ami nia prioridade estratéjiku iha Pasífiku tomak maka harii negósiu sustentável ida, signifika katak konsentra ami nia esforsu sira no kapital ne'ebé maka ami bele iha impaktu ida maka'as liu", esplika hosi Tessa Price, responsável rejional hosi ANZ ba Pasífiku.

Price konsidera katak ANZ hanesan "banku komersial boot iha Timor-Leste" orienta nia asaun ba apoiu ba "kliente sira ne'ebé impulsionadu ho movimentu hosi komérsiu no kapital iha rejiaun" no ne'ebé iha atividade ki'ik sira "hanesan ki'k hosi banku tomak iha Timor-Leste, ho menus 2% hosi kuota merkadu nian".

"Ami senti konfiante katak Timor-Leste sei hetan benefísiu hosi prosperidade ekonómiku iha prazu naruk no, konsentra iha banka komersial, ami bele iha impaktu ida boot liután iha moris di'ak hosi ami nia kliente sira no hosi komunidade sira iha ne'e", nia subliña.

Andre Young, responsável banku nian iha Timor-Leste, hatete katak desizaun ne'e hakarak kria "banku ida simples liu, ho foku klaru iha serbisu bankáriu komersial sira" no bele "oferese serbisu di'ak liu ba kliente komersial sira, investe esforsu sira no rekursu sira iha negósiu".

"Ami kompromete nafatin ho Timor-Leste, ne'ebé maka ami iha ona prezensa hahú tinan 2001, no ami sei fornese nafatin produtu internasional sira hodi atende kliente komersial sira iha rejiaun, ho foku iha komérsiu no iha merkadu global sira", nia hatete.

Young garanti ona katak funsionáriu tomak iha área retallu nian sei hetan kargu seluk iha área sira seluk banku nian.

Porta-vós ida hosi ANZ hatete ona ba Lusa katak fin hosi komponente retallu nian "sei laiha impaktu iha kustu sira fundu nian".

Fonte hanesan nega ona ba Lusa katak desizaun hosi banku ne'e iha relasaun ho situasaun ekonómiku no polítika ne'ebé maka Timor-Leste hasoru iha tinan ikus ne'e, ho difikuldade entre Governu no parlamentu hodi hamosu eleisaun antesipadu.

Nasaun hein hela formasaun hosi Governu foun no aprovasaun ba orsamentu tinan ne'e nian, ho Timor-Leste moris ho duodésimu dezde fulan-Janeiru.

Iha fulan-Marsu tinan ne'e, tuir informasaun ne'ebé publika hosi ANZ, banku iha empréstimu ba kliente sira ho folin dolar millaun 43 - volume boot daruak hosi sistema finanseiru Timor-Leste nian, hafoin hosi banku timoroan BNCTL.

Banku iha depózitu hosi kliente sira ho folin dolar millaun 139,33, ho depózitu millaun 139,33, valor boot datoluk hosi instituisaun finanseiru neen ne'ebé maka halo operasaun iha nasaun.

SAPO TL ho Lusa