terça-feira, 19 de junho de 2018

AMP entrega lista ho kompozisaun Governu nian ba Prezidente Repúblika

PARTILHAR

Líder prinsipal sira hosi Aliansa Mudansa ba Progresu (AMP), ne'ebé manán lejislativu fulan-Maiu nian iha Timor-Leste ho maioria absoluta, entrega ona iha loron-tersa ne'e lista ho kompozisaun ba Governu foun ba Prezidente.

Lista ne'e entrega ona durante reuniaun badak ida ne'ebé maka delegasaun AMP nian, lidera hosi Xanana Gusmão, Taur Matan Ruak ho José Naimori, mantén reuniaun ho Prezidente Francisco Guterres Lu-Olo.

Bainhira hakotu reuniaun no la divulga aspetu ruma hosi kompozisaun Governu konstitusional daualuk, Xanana Gusmão hatete ba jornalista sira katak hanesan enkontru lalais ida hodi ko'alia kona-ba aspetu balun hosi formasaun ezekutivu nian.

"Formasaun Governu nian hanesan kompeténsia hosi Prezidente Repúblika. Antes fó pose ba Parlamentu, Prezidente bolu ona partidu sira no hafoin fó pose no eleisaun hosi meza nia konvoka fali partidu sira", nia afirma iha deklarasaun ida lahó direitu ba pergunta sira.

Xanana Gusmão hatete katak AMP hili ona primeiru-ministru no agora Prezidente maka tenki nomeia xefe Governu, no hafoin ne'e fó pose ba membru sira seluk ezekutivu nian.

Fonte sira hosi AMP hatete ona ba Lusa, iha loron-segunda, katak koligasaun, iha loron-kinta liubá, hili ona Taur Matan Ruak nu'udar primeiru-ministru Timor-Leste nian, no informa ona Prezidénsia Repúblika.

Antigu xefe Estadu ho Prezidente hosi Partidu Libertasaun Popular (PLP), forsa ida hosi forsa tolu ne'ebé halo parte iha AMP, Taur Matan Ruak hanesan "númeru daruak" hosi lista koligasaun nian, hafoin líder istóriku Xanana Gusmão, ne'ebé sei kaer kargu nu'udar ministru Konselleiru primeiru-ministru nian.

Aleinde PLP, Congresso Nacional da Reconstrução Timorense (CNRT) ho Kmanek Haburas Unidade Nacional Timor Oan (KHUNTO) halo mós parte hosi AMP.

Iha nível global, Governu timoroan karik sei iha elementu na'in 40 resin, integra membru sira hosi partidu tolu AMP nian, ho elenku ne'ebé karik sei fó sai iha semana ne'e.

Francisco Guterres Lu-Olo kontinua rona partidu sira seluk ne'ebé maka iha fatin iha parlamentu, iha loron-tersa ne'e.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: