terça-feira, 19 de junho de 2018

Deputadu Renúnsia Mandatu Tenke Simu Uluk Mandatu


DILI, (TATOLI) – Tuir Sekretáriu Jerál partidu Frente Revolusionária Timor-Leste Independente (FRETILIN), Marí Alkatiri, deputadu foun bainhira renúnsia mandatu tenke simu uluk mandatu.

“Sira na’in rua (Xanana Gusmão no Taur Matan Ruak) la marka prezensa iha reuniaun ba dahuluk Sesaun Plenária ba Kinta Lejizlatura nian nomós seremónia juramentu nu’udar membru Parlamentu foun. Ha’u rasik iha dúvidas uitoan katak atu renúnsia hosi mandatu, primeiru, tenke simu uluk mandatu. Bainhira seidauk simu mandatu maibé halo ona renúnsia ba mandatu, ne’e la loos”, katak Marí ba jornalista sira iha Palásiu Prezidente Nicolau Lobato, Bairru Pité, kinta ne’e, relasiona ho líder másimu Aliansa Mudansa ba Progresu (AMP), Xanana Gusmão no Taur Matan Ruak, ne’ebé nu’udar deputadu maibé la partisipa iha seremónia juramentu nu’udar deputadu foun.

Tuir loloos, nia dehan, túr iha Parlamentu simu lai mandatu depois bele entrega ba kandidatu deputadu sira seluk.

Marí komenta povu bainhira vota ne’e vota ba lista ne’ebé taka ka lista tomak, maibé la vota ba ema ida-idak.

“Mandatu ne’e konta hosi bainhira ita hahú halo juramentu iha Parlamentu Nasionál. Maibé, prontu, ne’e interpretasaun ema ida-idak nian”, tenik.

Jornalista: Xisto Freitas | Editora: Rita Almeida

Sem comentários: