Dirijente ida hosi Partidu
Libertasaun Popular (PLP), partidu ida ne'ebé halo parte hosi koligasaun AMP
ne'ebé manán lejislativu timoroan sira ho maioria absoluta, garanti ona iha
loron-sábadu katak ativista Bella Galhos "nunka konsideradu
seriamente" ba Governu foun tuirmai.
"Hanesan honestu, Bella
Galhos nunka konsideradu seriamente hodi halo parte iha elenku hosi Governu
foun tuirmai", hatete hosi dirijente máximu ida hosi PLP ne'ebé lakohi
hatete nia naran ba ajénsia Lusa.
"Ha'u envolve iha prosesu
selesaun nian iha PLP nia laran. Ha'u hatene, klaru, katak nia nunka sai
hanesan kandidata forte ida ba kargu ruma", nia subliña.
Komentáriu sira ne'e mosu hafoin
Bella Galhos, ativista timoroan ida ne'ebé respeitadu tebes, afirma ona ba Lusa
katak nia naran hasai tiha hosi elenku ne'ebé seidauk koñesidu hosi Governu
Timor-Leste foun tuirmai, tanba kestaun "moral sira" relasionadu ho
nia orientasaun seksual.
"Ne'e hanesan informasaun
interna ne'ebé maka sira hato'o mai ha'u, iha partidu nia laran. Saida maka
sira hatete mai ha'u katak tanba hanesan LGBT, tuir moral ne'e labele
aseita", nia afirma.
Bella Galhos hanesan militante
hosi Partidu Libertasaun Popular (PLP), lidera hosi eis-Prezidente Repúblika
Taur Matan Ruak no ne'ebé halo parte iha Aliansa Mudansa ba Progresu (AMP),
koligasaun ne'ebé manán eleisaun iha loron 12 Maiu ho maioria absoluta.
Dirijente máximu sira hosi AMP -
Xanana Gusmão, prezidente hosi ongresso Nacional da Reconstrução Timorense
(CNRT), Taur Matan Ruak ho José Naimori (líder do Kmanek Haburas Unidade
Nacional Timor Oan (KHUNTO) - besik hakotu ona kompozisaun ba Governu.
"Ha'u la'ós hatete katak
ne'e hanesan pozisaun hosi "irmaun" Taur maibé ha'u senti triste
tanba nia la konsege kombate pozisaun ne'e", afirma hosi Galhos.
Dirijente PLP nian ne'ebé ko'alia
ba Lusa lamenta katak partidu "hetan akuzasaun ne'ebé la justu hodi halo
diskriminasaun ba nia iha prosesu selesaun nian", hodi insisti katak nia
forsa polítika "avalia de'it ema sira tanba nia serbisu ka kontributu no
la'ós tanba buat seluk, liuliu tanba orientasaun seksual".
Fonte hanesan konfirma ona katak
Galhos "ativa tebes iha PLP" maibé "feto sira seluk iha mós
asaun ativu liu duké nia dezde tinan 2015 no to'o kampaña".
Galhos, iha parte seluk, hatete
katak senti "triste tebes" tanba kestaun moral foti iha nia partidu
rasik nia laran, hodi afirma katak senti traidu tanba konvense joven sira ho
membru sira seluk hosi komunidade LGBT hodi apoia PLP.
"Hanesan deziluzaun boot
ida. Ha'u nunka hakarak halo parte hosi partidu polítiku sira. PLP dada ha'u
tanba hanesan alternativu ida no ha'u fó ona ha'u nia kontributu, inklui hosi
dalan finanseiru. Ha'u ajuda ona iha kampaña no apela ba joven sira no joven
sira LGBT hodi apoia ami", nia hatete.
"Ba joven sira ne'e ha'u fó
ona esperansa ba sira katak ho PLP buat hotu sei muda maibé afinal la'ós
hanesan ne'e. Ha'u senti diskriminadu", nia afirma.
Iha loron-sábadu ne'e, dirijente
prinsipal ida hosi PLP, Fidelis Magalhães, insisti ona katak Bella Galhos
hanesan "ema importante ida ba partidu" ho "obra ho kontributu komunitáriu
ida ne'ebé hetan rekoñesimentu di'ak".
Nia esplika katak labele halo
komentáriu ba kazu ka ba formasaun Governu nian, ne'ebé nia desizaun sira
"sei foti hosi líder máximu sira hosi partidu sira", Magalhães
rejeita ona katak kestaun hosi orientasaun seksual bele hanesan motivu ida.
"Bella hanesan ema matenek
ida, ema ne'ebé respeitadu no ho kontributu valiozu. Iha prosesu sira hanesan
ne'e iha kandidatu barak no ha'u labele komenta prosesu tanba ha'u la hatene
mós katak sei halo parte ka la'e iha Governu", nia hatete.
"Bainhira konsidera
kandidatu sira ba fatin polítiku ruma iha konsiderasaun barak no kandidatu
barak. Bella hetan nafatin respeitu hosi Taur rasik no hetan ona konviti
nu'udar konselleira ba asuntu sosial sira durante tinan sira iha nia
Prezidénsia", nia afirma.
Galhos, ho tinan 46, hanesan
líder ida ne'ebé koñesidu hosi sosiedade sivil timoroan, ho pasadu ne'ebé
nakonu ho viokénsia ne'ebé hahú iha família nia laran, hosi nia aman nia liman,
ne'ebé iha feen na'in 18 no oan na'in 45 no ne'ebé ho tinan tolu fa'an nia ho dolár
lima ba soldadu indonéziu ida.
Entre tinan 2012 no 2017, sai ona
nu'udar konselleira hosi Prezidente Repúblika, iha momentu ne'ebá, Taur Matan
Ruak, períudu ne'ebé harii ona no kere ona "Eskola Verde" dahuluk iha
nasaun, iha Leublora, hosi súl Díli nian, ne'ebé ohin loron funsiona kintal ida
no restaurante ida ho hahán orgániku no koperativu ida feto sira nian.
Agora daudaun jere Pouzada
Maubisse nian, iha sentru nasaun nian.
SAPO TL ho Lusa
Sem comentários:
Enviar um comentário