Leste Art Film Entrega Filme Badak Prátika Korrupsaun Ba KAK

DILI, (TATOLI) – Leste Art Film entrega ofisiálmente filme badak ho durasaun 18:39 ho títulu “korrupsaun mosu iha ezersísiu servisu funsaun públika nian”, ba Komisaun Anti Korrupsaun (KAK) iha salaun KAK iha Faról foin lais ne’e.

Filme ho konteúdu atu prevene timoroan sira servisu iha instituisaun públiku hodi hadook an husi prátika korrupsaun ne’e finansia husi United Nation Office on Drugs and Crime (UNODC) iha Timor-Leste.

Filme badak ne’ebé ho storyline iha funsaun públika ne’e, bazeia ba rezultadu peskiza KAK nian ne’ebé hatudu prátika korrupsaun akontese iha ezersísiu funsaun públika nian.

Produsaun filmajen ne’e nu’udar matéria prevensaun korrupsaun, ne’ebé UNODC no KAK prodúz atu dezmina informasaun konaba perigu aktus korrupsaun ba futuru nasaun.

Filmajen ne’e nu’udar meius efetivu prevensaun KAK nian, atu timoroan sira ne’ebé haknaar an iha instituisaun públiku, atu bele hakribi ba prátika korrupsaun ho ninia konsekuénsia sira bainhira monu ba krime korrupsaun.

Biban ne’e, Komisáriu KAK, Adérito Tilman agradese ba parte hotu ne’ebé involve iha prosesu produsaun filmajen ne’e, husi inísiu to’o mai iha rohan, hodi sai filmajen edukativu di’ak ida no reverénsia di’ak ida ba timoroan sira iha esforsu prevene an atu monu ba prátika korrupsaun iha ezersísiu funsaun públika.

“Agradese ba esforsu tomak hodi finaliza filme badak ne’e, hodi públiku bele akompaña tanba hahalok sira ne’e mak sempre mosu iha ezersísiu funsaun públiku nian”, tenik Adérito.

Nune’e mós, reprezentante Leste Art Film, Silvano Xavier Rodrigues agradese ba KAK, ne’ebé akompaña prosesu produsaun video ne’e, hahú husi loron dahuluk to’o remata.

“Ida ne’e hanesan esperiénsia ida ba ami hodi hatene konaba lalauk korrupsaun ne’ebé mak mosu iha ita nia rai laran”, dehan Silvano ne’ebé hanesan mós produtór ba filme ne’e.

Entretantu, partisipa iha serimónia entrega ne’e mak Komisáriu KAK, Adérito Tilman, Komisáriu Adjuntu, Manuel Bucar, ofisial KAK seluk, reprezentante Leste Art Film no sira ne’ebé involve iha produsaun filme ne’e.

Jornalista: Julia Chatarina | Editór: Manuel Pinto

Imajen: Komisáriu Komisaun Anti Korrupsaun (KAK), Adérito António Pinto Tilman. Foto FB Zelia Trindade