Diretór-jeral ba Koperasaun
Internasional ho Dezenvolvimentu hosi Komisaun Europeia (UE) hatete iha
loron-kuarta ne'e katak programa apoiu ba instituisaun iha kriasaun hosi
empregu iha área kultural sei promove asesu hosi artista sira ba merkadu
liuhosi Internet.
Stefano Manservisi asina ona, iha
loron-kuarta ne'e, iha sidade Santa Maria, iha illa kabu-verdianu Sal, apoiu
ida hamutuk euro millaun 26 hosi Uniaun Europeia ba Nasaun Afrikanu sira ho
Lian Portugeza no ba Timor-Leste (PALOP-TL) hodi promove empregu iha área
kultural (millaun 18) no reforma hosi jestaun finansa públika (millaun ualu).
Asinatura ne'e akontese bainhira
hala'o hela serbisu sira hosi simeira xefe Estadu no Governu sira hosi
Komunidade Nasaun sira ho Lian Portugeza (CPLP), ne'ebé hotu ona iha
loron-kuarta ne'e, no hetan prezensa hosi reprezentante sira hosi nasaun sira
ne'ebé halo parte iha programa.
Iha enkontru nia rohan, iha deklarasaun
sira ba jornalista sira, Stefano Manservisi subliña ona importánsia hosi
programa hodi muda atividade kultural sira iha ekonómiku, kria serbisu no bele
iha ajuda asesu hosi artista sira ba merkadu.
Ba Stefano Manservisi, programa,
ne'ebé sei kaer hosi Camões - Institutu Koperasaun no Lian nian no kordenadu
hosi Mosambike, "hanesan sasin forte tebes ida hosi koperasaun entre
Uniaun Europeia, PALOP ho Timor-Leste".
"Hanesan koperasaun antigu
ida, maibé sei renova, agora daudaun konsentra iha kultura hanesan kriasaun
hosi empregu no valor importante ba ema sira. Importante liuliu, iha liña ho
tema simeira nian no hanesan asaun ida ne'ebé sei to'o iha abut dezenvolvimentu
nian", nia hatete.
Responsável hosi UE adianta ona,
iha prátika, katak programa ne'e sei transforma "iha formasaun, asesu ba
merkadu no kriasaun hosi empreza kultural sira iha nasaun sira ho lian
portugeza".
"Múzika, teatru, ballet,
pintura hanesan realidade kultural sira no ami hakarak iha intervensaun hodi
halo sira sai mós hanesan atividade ekonómiku. Hosi ideia kriasaun kultural
nian to'o iha kriasaun ba empreza sira, asesu ba merkadu liuhosi Internet, hodi
nunune'e sira bele fa'an sira nia produtu, organizasaun ba enkontru sira
formasaun nian hodi nune'e buat ne'ebé hanesan ideia bele transforma iha
empregu", nia hatete.
Kona-ba komponente hosi apoiu
ne'ebé relasionadu ho reforma ba jestaun finansa públiku nian, Stefano
Manservisi destaka ona importánsia hodi kontinua fahe prátika di'ak sira iha
área administrasaun nian.
Ministru Negósiu Estranjeiru
Mosambike nian, José Pacheco, ne'ebé asina ona dokumentu hodi reprezenta Estadu
sira seluk, destaka ona hanesan prioritáriu asisténsia tékniku ba promosaun
hosi indústria kultural iha nível hosi Estadu membru sira.
"Rezultadu ne'ebé hein hosi
projetu ne'e maka atu nasaun sira sei kria fatin hodi bele promove liután
oportunidade sira empregu nian. Sei serve hanesan insentivu ida ba nasaun sira
hodi avansa ho firmi liu iha ámbitu hosi indústria kultura nian", nia
hatete.
Angola, Cabo Verde, Guiné-Bisau,
Mosambike, São Tomé & Prínsipe ho Timor-Leste hanesan nasaun sira ne'ebé
maka halo parte iha programa.
SAPO TL ho Lusa
Sem comentários:
Enviar um comentário