ESTADU ANTISIPA ELNINO HO BEE MOS NO AIHAN

Prezidente Repúblika (PR) Taur Matan Ruak, ho Primeiru Ministru (PM) Rui Maria de Araújo buka solusaun ba problema elnino hodi rezerva Bee moos no Aihan ba povu.

PM Ruai Araújo informa katak, Estadu agora dada’uk buka hela solusaun kona-ba bee mos ba povu, tanba bee iha fatin balu komesa maran ona.

“Iha informasaun ne’ebé hato’o ba Prezidente kona-ba, saida mak oras ne’e Governu halo hela atu akompaña efeitus husi elnino, udan tau ladun regular iha Timor Leste, i ita hatene mós katak, ida ne’e iha mós relasaun ho koelleta agrikultura ita nia populasaun ninian,” informa PM Rui Araújo ba jornalista sira iha Palacio Prezidensial Aitarak Laran Dili, Kinta (28/01).

Rui Araújo hatutan, enkontru ne’ebé nia halo ho Prezidente Repúblika Taur Matan Ruak, hanesan enkontru semanal hodi hato’o informasaun ba Xefe Estadu kona-ba lala’ok Governu nian.

Xefe Governu haktuir, agora dada’uk iha fatin balu mós bee komesa menus, hodi halo povu preokupa.

Rui Araújo dehan, nia hato’o ba PR Taur katak, servisu ne’ebé mak Autoridade Nasionál Protasaun Sivil halo, i medidas balu ne’ebé foti dada’uk ona hanesan, halo avaliasaun ba bee ninian, iha fatin sira ne’ebé persiza bee maka’as liu.

“Ezemplu ida mak hanesan iha Suai Vila no Beko, i haree oinsa atu hamosu meius para oinsa atu fó bee mos ba populasaun, i Ministériu Agrikultura ho Ministériu Komersiu Industria hala’o nafatin servisu hodi haree kolleta agrikultura nian ladun di’ak karik, saida mak Estadu tomak persiza halo atu bele fó apoiu nafatin ba ita nia komunidade sira,” relata Xefe Governu ne’e.

Rui Araújo esklarese, iha enkontru ne’e mós, sira halo avaliasaun ida kona-ba vizita Prezidente Repúblika Indonesia nian mai Timor Leste loron rua liu ba.

“Li-liu informa ba Prezidente Republika kona-ba, memorandum intendementu sira ne’ebé asina tiha ona, i ninia follow up ba implementasaun ne’e oinsa,” informa Rui Araújo.cos

Jornal Nacional