Kazu Emilia-Madalena, TDD Sei Rona Deklarasaun Pedro Lay

DILI - Tribunal Distrital Dili (TDD) sei rona deklarasaun husi sasin eis Ministru Obras Publiku Pedro Lay, ba kazu Partisipasaun ekonomi iha negosiu, abuzu poder no administrasaun danoza neebe involve arguida Emilia Pires no Madalena Hanjam.

Tuir offisial justisa neebe kaer prosesu nee hatete, tuir agenda neebe mak tribunal notifika ona katak iha loron (1/02/2016) sei rona deit deklarasaun sasin Pedro Lay neebe arola husi defesa arguida Emilia Pires nian. Neebe iha loron nee tribunal sei rona deit sasin ida nee.

Fontes nebe la temi naran nee hatutan, iha loron tuir mai (2/01) neebe antes nee fo sai ona katak sei rona sasin eis PM Xanana Gusmao, maibe ida nee seidauk klaru. Neebe ba sasin ida nee tribunal sei halo konfirmasaun fali.

Antes nee, Juis Presidenti Kolektivu Jose Maria de Araujo hatete, tribunal kolektivu ida nee sei hahu fali julgamentu ba kazu refere iha loron 1 too 5 de Fevereiru. Prosesu nee adia fali ba iha Fevereiru nia laran, tanba juis kolektivu nee mos iha agenda julgamentu neebe mak marka tiha ona. Neebe prosesu nee tenke adia fali ba fulan oin, dehan nia iha sala audensia TDD.

Tuir akuzasaun husi Ministeriu Publiku neebe lee sai iha tribunal katak, iha loron 9 Fevereiru 2011 arguida Madalena Soares haruka karta VMS/PM/11/50 ba Primeiru Ministru atu husu fundu adisional ida Ministeriu Saude ba alojamentu no alimentasaun mediku kubanu sira. (600,000 USD) unidade kardiolojia no hematolojia (400,000 USD) no kama ortopedika atus ida (100) (400.000 USD). Primeiru Ministru despaisa oinsa pedidu nee haruka ba Ministeriu Finansas.

Audensia nee prezide husi juis kolektivu José Maria de Araújo, Francisca Cabral no Maria Solana Fernandes, Ministeriu Publiku maka Prokuradora Angelina Saldanha, Lidia Soares ho Jacinto Babo no arguida Madalena Hanjam hetan asistensia legal husi advogadu privadu José Guterres no arguida Emilia Pires hetan asistensia legal husi advogadu Pedro Camões. Informasaun kompletu iha STL jornal no STL Web, edisaun Sesta (29/1/2016). Domingas Gomes

Suara Timor Lorosae