Xanana Gusmão garanti katak timoroan sira la permiti repetisaun ba krizi 2006

Eis-primeiru-ministru Timor-Leste nian, Xanana Gusmão, hatete iha loron-sesta ne'e katak maski tensaun polítiku atuál, timoroan sira sei la permiti atu akontese fali krizi 2006 nian no nasaun ne'e ema sei la bolu fali hanesan "falladu".

"Timor-Leste ema bolu ona hanesan nasaun falladu iha tinan 2006, tinan 10 liubá. Ha'u fiar katak señór sira hatene kona-bá dezenvolvimentu atuál hosi polítika internu nasaun nian", hatete hosi atuál ministru Planeamentu no Investimentu Estratéjiku timoroan nian.

"Ha'u hakarak garanti katak komunidade internasionál sei la bolu fali ami hanesan Estadu falladu ka posibilidade ba Estadu falladu", nia hatete bainhira loke konferénsia ida ne'ebé halo parte iha Fórum Ekonómiku Globál dahuluk hosi Komunidade Nasaun sira Lian Portugés nian.

Xanana Gusmão refere ba konflitu ne'ebé Timor-Leste hasoru iha 2006 - bainhira nasaun besik tama iha funu sivil ida - no ba diskursu ne'ebé Prezidente Repúblika, Taur Matan Ruak, halo iha Parlamentu Nasionál iha loron-kinta ne'e.

Xefe Estadu kompara ona benefísiu sira ne'ebé dirijente sira nasaun nian hanesan Xanana Gusmão ho sekretáriu-jerál Fretilin nian, Mari Alkatiri, fó nafatin ba "família no belun sira" ho hahalok hosi eis-ditadór indonéziu Suharto.

"Hahú tinan 2013, Xanana Gusmão, Mari Alkatiri, Lu-Olo [Francisco Guterres, prezidente Fretilin nian] uza unanimidade hodi halo sá? Sira la uza unanimidade no entendimentu hodi rezolve asuntu sira ne'ebé tenki rezolve. Sira uza ba poder no priviléjiu", hatete hosi xefe Estadu.

Iha nia komentáriu públiku dahuluk kona-bá deklarasaun sira, Xanana Gusmão husik ona mensajen ida hakmatek nian ba emprezáriu sira ne'ebé marka prezensa iha Díli, hodi ironiza ho deklarasaun sira hosi Prezidente Repúblika.

"Ha'u nia esperiénsia úniku ho ekonomia maka fó kontratu ba ha0u nia família sira. Profisaun ida ne'ebé agora koñesidu", nia hatete.

Iha tempu hanesan, nia ko'alia kona-bá "sentidu frajilidade nian" hosi líder sira no hosi instituisaun sira Estadu nian ne'ebé sei iha "faze konsolidasaun nian".

Xanana Gusmão nia intervensaun halo hodi hahú debate temátiku oioin ne'ebé hakarak analiza lasu komersiál sira, ekonómiku sira no hosi investimentu entre CPLP no Ázia & Pasífiku, kapitaliza iha oportunidade sira hosi lokalizasaun jeográfiku Timro-Leste nian.

Delegadu hosi nasaun 25, entre sira iha Indonézia, iha loron-sesta ne'e reprezenta hosi ministru Komérsiu, Thomas Lembong, partisipa iha enkontru emprezariál boot ne'ebé maka akontese ona iha Timor-Leste.

"Ami iha daudaun faze konsolidasaun nian ba instituisaun Estadu nian. Prosesu foun ida ne'ebé hanesan konstrusaun nasaun nian", nia hatete no refere katak hahú hosi 2002 emprezáriu timoroan sira sai hanesan halo parte maka'as hosi prosesu ne'e.

SAPO TL ho Lusa