Ministru indonéziu dezafia empreza luzófonu sira hodi aproveita vantajen sira iha Timor-Leste

Ministru indonéziu Komérsiu nian dezafia ona iha loron-sesta ne'e emprezáriu luzófonu sira hodi aproveita lokalizasaun jeográfiku Timor-Leste nian ne'ebé sei fó benefísiu iha tinan hirak tuirmai ne'e ba kresimentu ekonómiku hosi nasaun viziñu sira, liuliu Indonézia.

"Ba emprezáriu sira hosi nasaun luzófonu sira, Timor-Leste interesante tebes hanesan fatin ida hodi iha prezensa ida. Timor-Leste sei tama nafatin iha kresimentu ekonómiku hosi Indonézia no, tanba ligasaun ne'e, hosi kresimentu ASEAN nian [Asosiasaun hosi Nasaun sira Sudeste Aziátiku nian]", hatete Thomas Lembong.

"Ami apoia ofisialmente prosesu ba Timor-Leste hodi halo parte iha ASEAN. Sei falta halo buat barak, iha parte kapasitasaun nian. Maibé ha'u laiha dúvida katak Timor-Leste sei halo parte", nia afirma.

Thomas Lembong ko'alia iha konferénsia ida ne'ebé organizadu kona-bá Fórum Ekonómiku Globál dahuluk CPLP nian ne'ebé halibur iha Díli empreza sira hosi nasaun 25 resin, hosi área oioin, iha enkontru emprezariál boot liu iha istória nasaun nian.

Governante indonéziu, hosi jerasaun foun líder sira nasaun nian, felisita relasaun bilaterál sira entre Timor-Leste ho Indonézia ne'ebé aumenta daudaun - "fronteira demora oras tolu hosi Díli" -, nia konsidera katak pasadu liutiha ona.

"Timor hanesan viziñu ida ne'ebé apresiadu tebes. Ha'u hanesan ministru ida joven iha Governu. Ha'u hanesan jerasaun foun. Ami ladún iha memória kona-bá pasadu traumátiku entre Timor-Leste ho Indonézia. Ami senti haksolok tebes hodi mantén no hametin ami nia relasaun ho Timor-Leste", nia hatete.

Lembong konsidera ona katak maski ladún iha serteza no desaselerasaun, ne'e hanesan momentu di'ak ida hodi investe, ho "folin ki'ik", hodi konsidera katak ekonomia hosi nia nasaun hetan fali kresimentu ne'ebé maka'as.

"ASEAN ladún iha reputasaun hanesan klube ida ne'ebé ladún xateia. Progresu hanesan graduál tebes, ami la domina atensaun hosi imprensa. Maski nune'e, ASEAN sai hanesan oásis ida, illa estabilidade ida, ho kresimentu hosi 4% to'o 6%", nia hatutan.

Ekonomia indonéziu nian mós rekupera ho kresimentu previstu entre 5,2% no 5,3% iha tinan ne'e, nia hatutan. No senti mós ho diminuisaun hosi folin petróleu nian no hosi sasán importante sira nian, "iha ekonomia sufisiente diversifikadu ida" hodi bele rekupera.

SAPO TL ho Lusa – Foto: Ministru indonéziu Komérsiu nian, Thomas Lembong, ko'alia iha Fórum Ekonómiku Global dahuluk CPLP nian iha Díli, Timor-Leste, 26 Fevereiru 2016. EPA@ Bernardino Soares