Governu timoroan anula despaxu ne'ebé fiksa folin sira iha viajen aéreu

Iha loron-kuarta ne'e Governu timoroan anula tiha despaxu ne'ebé fó sai hosi diretór-jeral ida hosi Ministériu Obra Públiku, Transporte ho Komunikasaun sira ne'ebé fó sai iha inísiu fulan ne'e ne'ebé fiksa ona folin mínimu no máximu iha viajen aéreu sira.

"Konsellu Ministru sira desidi ona anula Despaxu hosi diretór-jerál hosi Ministériu Obra Públika, Transporte no Komunikasaun sira nian relativu ho reuniaun iha loron 18 Maiu ikus, entre visi-ministru hosi Obra Públiku, Transporte ho Komunikasaun sira ho reprezentante sira hosi kompañia aéreu sira ne'ebé halo operasaun semo Díli-Denpasar-Díli ne'ebé fiksa ona folin mínimu no máximu sira ba tarifa sira", esplika hosi ezekutivu iha komunikadu.

Komunikadu la justifika desizaun anulasaun nian ne'ebé foti ona iha reuniaun hosi Konsellu Ministru sira iha loron-tersa, haktuir hosi ezekutivu iha komunikadu ne'ebé fó sai iha loron-kuarta ne'e.

Despaxu polémiku ne'ebé fiksa ona folin mínimu no máximu ne'ebé konsidera "justu" entre dolár 110 no 175 ba viajen ida ba no fila nian, ba ligasaun aéreu sira Díli-Bali, interfere iha merkadu privadu ne'ebé iha.

Diretór-jeral hosi Transporte, Joanico Gonçalves, hatete ba Lusa katak desizaun ne'e foti ona "hamutuk" iha enkontru entre Governu ho responsável sira hosi aviasaun sivil ho operadór na'in tolu ne'ebé halo ligasaun aéreu sira entre Timor-Leste ho Indonézia.

Akordu ba folin sira - ne'ebé estabelese folin mínimu dolár 110 no máximu dolár 175 ba viajen ida ba-mai entre Díli ho Denpasar, iha illa indonéziu Bali - hanoin atu hala'o hahú loron 01 Juñu no hanoin halo pelumenus tinan ida.

Desizaun ne'e hamosu polémiku maka'as iha Timor-Leste, dahuluk tanba intervensaun hosi Estadu hodi fiksa folin sira no, hafoin ne'e, tanba fiksa folin mínimu sira ne'ebé hanesan karun liu duké folin balun ne'ebé pratika iha merkadu.

SAPO TL ho Lusa