LERE: “EMA NE’EBÉ TROKA AMI, TENKE DI’AK LIU HA’U”

Xefi Estadu Maior das Forsas Armadas Falintil Forsa Defeza Timor Leste (F-FDTL), Maijor Jeneral Lere Anan Timur hateten katak, ema ne’ebé hakarak troka veteranu sira iha F-FDTL nia laran, tenke halo buat ne’ebé di’ak liu buat ne’ebé veteran sira halo agora iha F-FDTL nia laran.

Lere Anan Timur hatutan, durante nia mandatu tinan rua ne’e, nia sei halo buat ne’ebé mak koresponde ho F-FDTL nia realidade.

“Li-liu ita nia kapasitasaun rekursu humanus, no hanesan ha’u dehan ona katak, ida ne’ebé troka ami ne’e, labele hanesan ha’u, tenke di’ak liu ha’u dala 10,” informa Lere Anan Timur ba jornalista sira iha Palácio Prezidénsial Aitarak Laran Dili, Kuarta (08/06), hafoin hasoru malu ho Prezidenti Repúblika, Taur Matan Ruak.

Alénde ne’e, Lere Anan Timur informa katak, sorumutu ho Prezidenti Repúblika (PR) ne’e, hanesan enkontru rutina ne’ebé nia halo kada semana hodi informa progresu ne’ebé la’o iha F-FDTL nia laran.

“Ha’u hasoru Prezidenti kada loron Kuarta, hanesan reuniaun bai-bain, ha’u informa de’it atividades ne’ebé mak ami atu hala’o dada’uk,” katak Lere.

Nia hateten tan katak, primeira atividade mak, agora dada’uk Timor Leste (TL) hala’o hela ejersísiu konjuntu ida ho nasaun barak hanesan, Amerika, Japaun, Australia no Nova Zelandia, Canada no Singapora.

Nia hatutan, iha sorumutu ho Xefi Estadu ne’e mós, sira ko’alia kona-ba Ministru Defeza Japaun nia vizita mai TL.

“Vizita Ministru Defeza Japaun nian halo aban (ohin), i Sekretáriu Estáriu Estadu Defeza Portugal iha loron 14 Junho,” afirma Lere.

Nia dehan, vizita Ministru no Sekretáriu Estadu nasaun rua ne’e, tuir kooperasaun téknika militar entre nasaun hirak ne’e.cos

Jornal Nacional